الدراسة في رمضان

Discussion in 'Blog | NerdsMethods' started by NerdsMethods, ‏2/5/19.

  1. NerdsMethods

    NerdsMethods

    Staff Member Nerdsmethods
    Joined:
    ‏15/11/18
    Messages:
    4
    السلام عليكم و رحمة الله و بركاته:heartbeat:
    مبارك عليكم الشهر و الله يعوده عليكم بالصحة و العافيه:blueheart:

    دفعتنا كانت اول دفعة تمتحن الفاينل في رمضان، وكنا خايفين و مو عارفين شلون ننظم وقتنا خصوصاً للي متعودين يدرسون الصبح . بس سبحان الله الله باركلنا بوقتنا و بالعكس التوقيت الرمضاني نظم دراستنا اكثر و حتى مستوانا ما انخفض ولله الحمد ، يمكن الصعوبة كانت بس بأول يومين و بعدها ترتبت امورنا ، سهلوها بتتسهل ان شاءالله:heavycheck:

    أول نصيحة وأهم نصيحة...
    للي متعود يدرس الصبح لا تتبعون نفس الطريقة، لأنكم راح تتعبون وتضيعون وقتكم لا أنتوا اللي درستوا عدل ولا أنتو اللي ارتحتوا

    شنو تسوون عيل؟
    درسوا الدروس السهلة قبل الفطور بثلاث ساعات ونص مثلاً او اربع (بس ما افصل اكثر من اربع )، ليش ماتبدون بالدروس الصعبة؟ لانكم مو ماكلين و طاقتكم مو عالية اذا بديتوا بالدروس الصعبة احتمال كبير تخلصون كمية قليله جداً بوقت طويل
    و هذي الدروس تدرسونها على نفس ما انتوا متعودين سواء تدرسون ٥٠ دقيقه و بريك ١٠ دقايق او اقل او اكثر المهم (مو اكثر من ساعه او اقل من نص ساعه دراسة)

    الحين صار وقت الفطور وتفطرتوا وخلصتوا...
    بلشوا بأصعب درس بالمادة لين توصلون للاقل صعوبة ، لو فرضنا ان عدد الدروس الصعبة ٨ بعد الدرس الرابع اخذوا بريك نص ساعه ، اكلوا اقروا قرآن او سووا اي شي من عاداتكم الرمضانية المهم انكم تبتعدون عن الدراسه عشان تريحون وبعدها كملوا باجي الدروس

    :exclamation:ملاحظات:exclamation:

    - قبل لا تبلشون دراسة خططوا شنو الاشياء اللي بتدرسونها قبل الفطور و شنو عقب ، حددوا كل شي بتسوونه بالضبط ، كتبوا هذي الاشياء بنوت وخلوها جدامكم

    ـ غير أنكم تدرسون الدروس السهلة قبل الفطور ، ايضاً اي جزئية سهلة او انتوا متمكنين منها في المادة خلصوها قبل الفطور عشان ماتنضغطون وايد عقب ، يعني مثلاً: القوانين انتوا اساسآً حافظينها عدل راجعوها كلها قبل الفطور ، مثال ثاني : اذا انتوا حافظين كل التعاريف عدل راجعوهم قبل الفطور، يعني حاولوا تخلصون كل الأشياء اللي تحسون أنكم تقدرون عليها لا تخلون الا الشي اللي صج صعب .

    -لا تكثرون على الفطور عشان ماتدوخون:sweatsmile:

    -حاولوا قبل صلاة الفجر تكونون خالصين كل شي عشان تنامون بعد الصلاة على طول

    -قعدوا قبل لاتطلعون من البيت بنص ساعه راجعوا فيها و ركزوا على الأشياء اللي دايماً تنسونها ،اواذا كانت المدرسة بعيدة عن البيت راجعوا بالسيارة

    -كثروا من شرب الماء


    الأخطاء اللي وقعنا فيها❌

    - بأول يومين كنا خايفين ان مايمدي نخلص فكنا نبلش قبل الفطور بست ساعات بالأيام اللي مافيها امتحانات ، كان حيل تعب و مانقدر نكمل ، ندرس اقل من نص ساعه وناخذ بريك لان تعبنا ، عشان جذي لا تبلشون حيل مبجر❗️

    ـالبعض كانوا يروحون الامتحان مواصلين و يردون ينامون لي مابعد الفطور و ما أنصح بهالطريقة، ليش؟ صح انكم درستوا بأوقات الفطر و دراستكم كانت بتركيز لكن لما يصير وقت الامتحان بتتعبون و ماراح تحلون عدل الحين شنو استفدنا من الدراسة العدله‼️

    بالنهاية.....
    صوموا مثلاً قبل رمضان بيوم جربوا و شوفوا الوضع شلون
    استغلوا الشهر الفضيل بالدعاء ، لا تقصرون في عباداتكم و نظموا يومكم عدل راح تلاحظون ان في وقت حق كل شي:heartbeat:


    ياريت لو أحد عنده تجربة عن الدراسة برمضان تشاركونا او اذا عندكم اي اقتراح:blueheart:
     

Share This Page