16' الكورس الأول ..First Semester

Discussion in 'سنة ثانية' started by Ghadeer AlDahham, ‏21/6/18.

?

الي خلصو هالكورس شرايكم فيه ؟

  1. كان خوش كورس ماكو مثله

    2 vote)s)
    100.0%
  2. كان كورس غثيث الله لايعودها من أيام

    0 vote)s)
    0.0%

  1. Ghadeer AlDahham

    Ghadeer AlDahham

    Trainee
    Joined:
    ‏13/6/18
    Messages:
    3
    بسم الله الرحمن الرحيم
    السلام عليكم
    في البداية أحب أباركلكم على نجاحكم في سنة أولى المعروف عنها انها النقلة بين انكم تكونون طلبة ثنوي لي طلبة جامعة ..
    وبدون مقدمات زايدة ببلش أتكلملكم عن سنة ثانية يا طلبة وطالبات الصيدلة الأعزاء:handwaving:..
    الكورس الأول من سنة ثانية صيدلة :
    هالكورس أعتبرة تكملة للمواد التمهيدية الي خذيتوها بسنة أولى بس الفرق انهم حيييل أخف و أحلى وكيوت وكل شي وهم كالآتي..

    1- انجلش 183 عليها 5 وحدات، تكملة على أول كورسين انجلش 181و182 بس المميز الحين انهم بيعاملونكم بتساهل أكثر من حيث الدرجات وبتكون نسبة كبيرة من الدرجات بايدكم ف الي ماقدرو يجيبون القريد الي يبونه في فرصة كبييييرة هالكورس ،،
    أنا اقولكم شلون .. الكورسين الي طافو اكثر الدرجات تكون على ال reading, listening, &vocabulary ف غالبا صعوبة وسهولة الامتحان يحددها القسم ومرات تييكم مواضيع بكلمات غريبة ومامرت عليكم من قبل ف حتى ماتقدرون تشيرون المعنى Vs أما هالكورس 183 أغلب الدرجات تكون على مقالات أنتو تختارون موضوعها وأنتو تكتبونها وتختارون تقسيمة المحتوى مثل
    ( procedure, post-procedure, treatment, symptoms etc. OR if you choose to write about a drug "as a pharmacy student" which include side effects, drug interaction, indications, )
    في تيجرز كانو يرضون ان الطالب يكتب عن الي يبي ف يكون المجال مفتوح يكتب الليييييي يبي .. أما تيجرز ثانيين يلزمون الطالب يكتب عن تخصصه ( طب بشري عن مواضيع الطب البشري / صيدلة عن أدوية أو عن طرق علاج مرض معين بحيث تتكلمون بكل فقرة عن العلاجات المستخدمة لكل مرحلة من المرض نفسه ..في بداية المرض*في مرحلة متقدمة*أخطر مرحلة وهكذا / طب أسنان أمور متعلقة بالأسنان) وغالبا أكثرهم متساهلين من حيث القواعد والسبلنق والفورمات ويمشون ..
    وبعد الي يميز هالكورس عن الي قبله ان في برزنتيشن وركزو عالملاحظات الي يقولونها التيجرز لكم .. من
    answering questions at the end of your presentation& eye contact &good body language &voice tone.

    واكيد في درجات عالمدتيرم والفاينل وشوية فوكابلري نفس الكورسين الي طافو.
    وتقسيمة الدرجات يوزعونها مع السلبس *المنهج* بداية أول كلاس جيكو عليهم.

    2- مادة الاناتومي Anatomy الي اهي علم التشريح عليها 3 وحدات
    هالمادة بتكون مشتركة مع طلبة الطب المساعد في قاعة عبدالرزاق وعدد الطلبة في الكلاس كبير مايقارب 150 ومرات يصير ازعاج وورقة التوقيع ماتوصل ومن هالكلام ..
    الحلو بهالمادة ان القريد مضمووووووووووووون :hearteyes: يعني الي يدرس ويحفظ ويفهم عدل رح ياخذ A بسهولة ومهم مهم مهم تحلون امتحانات قديمة لأن غالبا نص الامتحان متكرر ورح تعرفون شلون يسأل كل دكتورونظامه وهالشي ينطبق على أغلب المواد .

    اذا درسكم د أكرم (بيعطيكم جزئيه العظام) لاتطوفون محاضراته ..واللاب يشرحونه TA أساتذة مساعدة بس اذا في مجال كلمو الدكتور يشرحلكم لأن شرحه عجيب عجيب .. في بنات ينزعجون من قطاته والنكت الي يقولها بالمحاضرة وطريقة شرحه بس الاغلب جمع على انه عجيب ويفهم.

    وعموما الدكاترة يفهمون والكمية بسيطة والأسئلة سهله وحتى تقسيمة الدرجات وايد زينة يعني بالمدتيرم يكون أسئلة وايد والدرجات ينقسمون بحيث الي تغلط تنقص شوي.

    وطبعا الامتحان بيكون جزئية نظرية (MCQs) وعملي (بالامتحان يحطولكم صور بالبوربوينت ويوزعون ورقة في أرقام مرقمة نفس الصور وأنتو تكتبون اسم الشي الي بالصورة وغالبا كل دكتور يوريكم الصور بيوم البراكتيكال/اللاب سواء بالبوربوينت بالقاعة او بالمشرحة عالجثث ومايطلعون منهم.. الا جزئية الكارديو ممكن تكون أصعب غالبا يقولكم درسو عدل لان ممكن اييب صور من كذا جهة يمين يسار من فوق وجذي )


    3- مادة الرياضيات المنتهية .. اوكي اسمها يخرع بس اهي وااااااااايد سهله وتحسون نفسكم رديتو الثنوي عليها 3 وحدات واسمها بالانجلش فاينايت 115 .
    ملاحظة بسيطة ياجماعة: هالمادة ممكن/احتمال تنلغي لدفعة 2017 والي بعدهم.
    رح تاخذون مواضيع بسيطة حيل حيل وسهله والي تدرس بعد كل كلاس واايد رح يساعدها لان خصوصا الرياضيات كل درس له أفكار ف حلو انكم تراجعونهم وتتدربون عالحل .. والدكتورة كانت تقولنا حلو امتحانات قديمة من موقع جامعة لكويت - قسم الرياضيات- تحطون رقم المادة 115- ويطلع لكم امتحانات قديمة كل مدتيرم و فاينل على مر السنين والعصور الي طافوو.

    نظام الدرجات يقولكم عليه الاستاذ الي بيدرسكم وغالبا يتضمن 4 كويزات ومدتيرمين و فاينل، مقالي وموضوعي(مسائل & اختياري).

    وعادي جدا تاخذون بواحد من الكويزات 2/10 وستيل تاخذون A اخر الكورس .. يعني لاتتحبطون بأي وقت خلال الكورس وتحسون انها نهاية الدنيا .. دايما في مجال تعوضون وتاخذون القريد الي تبونه.
    وممكن المدتيرم او الفاينل يكون الساعه 6ونص المغرب ..ف عادي.

    4- مادة الكيمياء العضوية - اورقانك كمستري وعليها 4 وحدات
    هالمادة اللطيفة الي نوعا ما يبيلها مجهود كبير.. أقصد كبييييييير..
    مادة رح تتعلمون فيها عن المجموعات الوظيفيةfunctional groups الي اهم الكحول والايثر والاستر والالدهايد و الحمض الكربكسيلي (اي اي الي خذيتوهم بالثنوي بس لاتستهينون فيها المادة لأن فيه تفاصيل أكثر) و رح تتعرفون على تفاعلاتهم و تسميتهم وطرق تحضيرهم و و و ....

    الشي الي يساعدكم بالدراسة ان الدكتور (Prof.Philips ) مقسم المنهج بحيث يتكلم عن مجموعة وظيفية وكل تفاعلاتها ومعلوماتها بعدها ينتقل للمجموعة الي بعدها (الا في جم معلومة ممكن يقولها بداية الكورس بعدها يشرحها بالتفصيل اخر الكورس:okay:شالسبب؟ محد يدري),, ف المقصد كل ماتخلصون مجموعة تدرسونها عدل عدل .. وينصحكم بكتاب كبير وثقيل اسمه فسدن وايد مفيد بحيث بعد كل جابتر(لكل مجموعة وظيفية )اسئلة تحلونها وتثبت المعلومات الي عندكم ومنها تتدربون للامتحان.. وهالكتاب فيه شرح لكل الي بتاخذونه في طلبة وطالبات استفادوا منه في فهم بعض الجزئيات الي مافهموها خلال الكلاسات وايد وايد ينصحونكم فيه.

    وهالدكتور بيدرسكم بسنة ثانية و رابعة كلا الكورسين ، ويكون فيه كلاس تتوريال يحطلكم اسألة وتحلونها ويشرح شلون تنحل.. نصيحة للي يحسون نفسهم مافهمو بالكلاس او عندهم صعوبة بأي جزئية احضرو التتوريال واستفيدو واخر التتوريال تسألونه بشغلات موعارفينها .. واذا بعد عندكم اسألة روحولة المكتب بالدور الثاني عند أقسام الصيدلة (مرة ماكنت حاضرة كلاس ف رحتلة المكتب شرحلي النوتة بعشر دقايق وفهمتها وطوف الشغلات الي مرح يسأل عليها بالامتحان).

    وبعد هالدكتور رح تدرسكم دكتورة فاطمة العوضي ..نوتها سهله وبسيطة من حيث الكمية وتخلص المحاضرة بنص الوقت غالبا الافكار الي تقولهم بالكلاس تييبهم بالامتحان ف ركزو عدل مدل بكل شي تقوله + التتوريال الي تسويه مهم مهم مهم .. اسألتها بالميدتيرم ماكانت واضحة ويبيلهم تفكير وربط بكذا شي أما الفاينل كانت اسألتها سهله وبسيطة .. وتقسيمة الدرجات كانت كويزين يا ياخذون الآفرج أو الدرجة الاعلى + مدتيرم+فاينل .. وبعد الكويز والمدتيرم يكون في تتوريال يناقش فيه كل دكتور الاسألة الي أغلبكم غلطو فيها .. احضرو عشان تعرفون طريقة الحل وتتعلمون من أغلاطكم:handok:.

    وضمن المادة في لاب يوم بالاسبوع : والفاينل يكون أوبن بوك يعني تدخلون فيه الاوراق الي كنتو تشتغلون عليها والملاحظات الي كنتو كاتينها .. وبعد يعطونكم مخطط تمشون عليه يسهل عليكم الامتحان .. في تجارب كانت تطول وغيرها بسيطة مجرد تكتبون الالوان والريحة و و و ...

    على دفعتي امتحانا الميدتيرم كان صعب والي طلعت من الامتحان تبجي واخترعنا وصج القريدات كانت نازلة والافرج كان C .. بس حضرنا المراجعة مالت المدتيرم وعرفنا الحل وشلون ندرس عدل والفاينل كان زين وارتفعت القريدات .
    ف لاتتحبطون من اول قريد والفاينل عليه وايد تقدرون تعوضون.

    وبجذي نخلص مواد هالكورس ومجموع الوحدات 15 وحدة..وان شاء الله يفيدكم هالموضوع وتكون سنة حلوه عليكم وسامحوني عالقصور موفقين.
    :praying::praying:
    **ممكن بعض الشغلات تتغير من مواد ودكاترة
     
    KU-Med likes this.

Share This Page