10' سنة ثانية صيدلة بداية المشوار

Discussion in 'سنة ثانية' started by صيدلانية المستقبل, ‏14/9/15.

  1. صيدلانية المستقبل

    صيدلانية المستقبل

    Consultant
    Joined:
    ‏14/2/14
    Messages:
    49
    السلام عليكم


    مبروووك النجاح بسنة أولى وان شاء الله درجاتكم عاجبتكم وحتى لو كان معدلكم نازل بسنة أولى لا تحاتون لأن سنة ثانية إذا شديتوا حيلكم فيها تقدرون اتييبون درجات حلوة ترفع المعدل :grinning:

    سنة ثانية سنة حلوة وخفيفة أحلى من سنة أولى لأن المواد أحلى ودكاترتنا الصيدلة راح يدرسونكم في أغلب المواد

    هذا الرابط فيه شرح مختصر لكل مادة بسنة ثانية الكورس الأول
    ku-med.com/forums/threads/728

    استغلوا الكورس الأول عدل عدل ودرسوا أول بأول وحاولوا تنظمون وقتكم لأن سهل اتييبون ال A

    :confuse: غلطتي لا تغلطونها: لعبت بسنة ثانية وما درست أول بأول وكودت النوت ودرجاتي نزلت وخصوصًا بالكمستري ،، وانا الحين متحسفة لأن المواد حلوة وايد ،، وبالكمستري اللاب بغيت أحرق المختبر بس عدت بسلام
    :tongueclosed:


    مواد سنة ثانية الكورس الثاني

    عندكم 4 مواد (فسيولوجي – كمستري – براكتس – سوتيكس)

    الكورس الثاني راح يفرق عليكم عن الكورس الأول لأن دشيتوا بالصيدلة الصجية وهالكورس يعتبر مقدمة للصيدلة

    الفسيولوجي

    راح تتكلم المادة عن وظائف الاعضاء في جسم الانسان
    يبيلها دراسة أول بأول ،، وأكو دكاترة تحتاجون تنوتون معاهم علشان تفهمون
    المادة إذا جابلتوها عدل عدل راح اتييبون فيها قريد عالي ولا تطنشونها وتكودون النوت لي قبل الفاينل بجم يوم لأن عادي أكو طلبة طاحوا ريست فيها أو عادوا السنة والغلطة غلطة الطالب مو دارس وقاط النوت مو لأن المادة صعبة

    ملاحظة: عودوا نفسكم عالدراسة أول بأول لأن هالشي راح يساعدكم حق سنة ثالثة ورابعة وحاولوا أنكم تستغلون سنة ثانية في رفع المعدل

    :confuse: غلطتي لا تغلطونها: كنت مو دارسة أول بأول ولا أنتبه بالمحاضرات و لا أنوت مع الدكاترة والنتيجة سقطت بالميدتيرم ،، بس بعدين من الخرعة جابلتها عدل ودرستها وحاولت أنظم وقتي والحمد لله عديتها بدون ريست

    براكتس – كمستري - سوتيكس

    هالمواد راح يحسسونكم أنكم صج صيادلة وهي البداية اللي راح تكملون عليها بسنة ثالثة لي خامسة
    لا تحاتون دكاترتنا راح يتكلمون عنهم في أول يوم وراح تعرفون كل شي وأتوقع القوائم راح يسوون لكم لقاء يعرفونكم عالمواد
    همن يبيلهم دراسة أول بأول وخصوصًا البراكتس
    الحلو فيهم أن إذا جابلتوهم تقدرون اتييبون A و B بسهولة وكلش مو تعجيزيين

    بهالكورس راح تحسون أن الكويزات زادوا عليكم وهالشي راح يفيدكم أن يخليكم تدرسون النوت أول بأول وتشوفون طريقة الاسئلة و اسلوب الدكاترة

    :confuse: غلطتي لا تغلطونها: كنت ما أدرس حق كل الكويزات فتكودوا النوت علي وصار ضغط علي بالفاينل حيييل وما يبت درجات عالية بالمواد بس الحمد لله عديتهم بدون ريست

    - أهم الملاحظات:

    1- أكو دكاترة التنويت معاهم مهم مهم مهم مهم لأن الامتحان اييبون من كلامهم وعلشان تفهمون المادة عدل
    2- سئلوا الطلبة الايجابيين الأكبر منكم عن نظام الدكاترة بس عن نظامهم وطريقة أسئلتهم لأن أكو طلبة عادي يكرهون دكتور معين ويطلعونه مو زين وظالم ومن الكلام المحبط عنه ما تقدرون تدرسون نوته وآخر شي يطلع خوش دكتور ويفهم بس اسلوبه شوي شديد
    3- الوقت تنظيمه مهم من ثاني اسبوع دوام وهالشي راح يساعدكم بسنة ثالثة
    4- حسنوا علاقتكم مع الدكاترة كدفعة ،، الحين انتو دفعة يديدة عليهم عطوهم انطباع حلو عنكم وانتو اللي راح تستفيدون حق السنين الياية وسمعة الدفعة تنتقل من دكتور لي دكتور
    5- توكلوا على الله ولا تقارنون نفسكم بغيركم وبإذن الله بتعدونها وبقريدات حلوة


    السموحة لأني ما تكلمت بالتفصيل عن المواد والدكاترة لأن مو متذكرتهم عدل وأخاف صارت تغييرات بالمنهج والدكاترة واسلوبهم
    موفقين ان شاء الله زملاءنا صيادلة المستقبل وهذي السنة اعتبرها بداية المشوار في كلية الصيدلة وعساها تكون سنة حلوة عليكم
    :blush:


    الكلام اللي ذكرته بالموضوع وفقًا لتجربتي الشخصية لسنة ثانية دفعة 2010 فممكن صارت تغييرات بالمنهج و الدكاترة أو ممكن ظلت نفسها ف سامحوني عالقصور



     

Share This Page