12' تجربتي في سنة ثانية طب

Discussion in 'سنة ثانية' started by مجند طبي, ‏17/7/14.

  1. مجند طبي

    مجند طبي

    Trainee
    Joined:
    ‏16/7/14
    Messages:
    30
    بسم الله الرحمن الرحيم

    بالبداية آحب آبارك قبولكم و فكة المنافسة
    وهذا انجاز لازم تفتخرون فيه و الفال لباقي طموحكم
    ------------------------------
    طبعا شوفوا الطب بالكويت اعتبره شخصيا ست سنين مو سبع

    يبتدي من سنة ثانية ….اما سنة آولى فهي تآسيس و تدريب

    -----------------------------
    تجربتي الشخصية :
    هالسنة حاشتني ضيقة و قمته وكله مالي خلق "لاي شي" …باختصار اكتآبت طوول السنة
    ما راحت الا لما طلعت النتايج

    ليش شصارلك يامجند طبي ؟
    السنة لهدرجة صعبة ؟
    مالنا خلق عوار راس وشقا ؟​

    آنا اعلمكم ،،،، ومايصير خاطركم الا طيب

    ------------------------------------------------------​

    من بداية سنة ثانية اعتبر نفسك مستجد و مو عارف شي
    لان سنة اولى مو مقياس للدراسة تبني عليها الست سنوات الباقية

    فهذه السنة هي بدااااااية انطلاقكم للطب لحد التخرج وتصيرون دكاترة

    احم احم


    ------------------------​

    هالسنة كانت نظام جديد….وانا كنت داش عبالي مثل سنة اولى كود نوت عادي بيوم واحد تخلصهم
    ولهيت بسوالف ثانيه مع الشباب بالكلية "ماكانت المفروض ابديها على دراستي"
    لاني اكلتها !!

    اي و الله اكلتها….لاني كان مخي مبرمج على سنة آولى

    فكانت النتيجة في الاختبارات الاولى ،،،، F

    يعني ساقط مع مرتبه الشرف !!

    انا اللي وييين كنت و شلووون صرت !​

    -------------------------​

    ولان درجات سنة ثانية طوول السنة من 100 --مثل الحصالة

    فكانت يحتاجلي قوة خارقة اني انجح وارفع الavarge

    لفوق الــ60٪

    -------------------------
    فقدت الامل ! قلت خلاص راح اعيد السنة !

    كل شي تسكر بويهي !

    بسبب اهمالي وتقصيري !

    لان دراسة سنة ثانيه اول باول وتفكر بالنجاح الاول مو الدرجة مثل سنة اولى !

    وانا كنت اكود كل شي !

    لان النوت تحتاج دراسة مرة مرتين والمرة الثالثه تكون مراجعة

    عشان ترسخ في عقلك لان المعلومات جديييييدة 100٪

    والكمية كبيره ….فتنسى بسسسرعه

    وانا كنت ابي اخلص المنهج كله في يوم !

    تخيلوا تأنيب الضمير اللي عشت فيه !

    ترى للعلم في شغله انا ملاحظها انه اغلب
    اللي زفتوا بثانيه كانوا باولى شطار او معدلاتهم عاليه !


    يمكن لانهم اغتروا بزود و ما عرفوا انه اولى مالها شغل بثانيه !

    لاعت جبدي وقتها من كل شي !

    خلاص اشحقه اشد حيلي ساقط ساقط !

    12 سنة ادرس وكله متفوق وفوق هذا عقبة القدرات وفوق هذا عقبة القبول في سنة اولى

    راح تطير في شهور !

    بسبب الاهمال !

    ليش ؟​

    شنو حجة هالاهمال ؟!
    الجواب الغبي : ماوراي قبول وهمي نجاح


    المشكله تدرون وين ؟

    انه المقبولين -وانا منهم- عبالهم طريقة سنه اولى مثل ثانيه
    تدرس اي شي وتاخذ قريد عالي…..

    والمحاضرات كنت ساااااحب طبعااا

    ليش احضر ؟ كل شي بالنوتة ؟

    يا حلو نومة البيت ….

    انام 10 ساعات واقعد مصحصح وراح ادرس ان شالله

    --------------------
    كنت اقص على روحي لاني اكتشفت الكسل راح اييب كسل

    وبالنهاية لامحاضرات لا دراسة "صجية"
    ولا لي خلق…..لاي واحد يتفلسف على راسي وينصحني

    -----------------

    مرت عطلة الربيع

    ….اجر ذيول الهزيمة

    مكسور ….

    وبيني وبين نفسي أقول :

    شكلي مو قد الطب

    الطب كراف ،،،،،،خل اسحب اوراقي واقدم كلية التربية الاساسية

    مدرس مرتاح ….لاعوار راس وراتب حلو ،،،،وعايش حياتي صح

    بدال ضيقه الخلق !!!


    فجأة بدون مقدمات قلت لحظة لحظة !

    شقاعد اقول انا ؟
    اهدم مستقبلي بايديني

    عشان درجات زفت فيه


    فقلت خلاص دام اني ساقط ساقط …. خل ادرس كمية الكورس الثاني عشان لما اعيدها ،،،اركز ع الكورس الاول

    ===========​


    وبدأ الكورس الثاني


    ومرت الايام

    ماكنت زعلان،،،،كنت معصب لاني ابي اشد حيلي

    فشغلت التيربو ،،،،

    ولما علقوا درجات أول امتحان في الكورس الثاني Fb2

    كان اعلى امتحان طول السنة من حيث الدرجة


    خفت وماقدرت اوقف جدام اللوح …فقررت اني اقعد بوحده من القاعات واشوف الدرجة واتساب


    فجأة واسمع صراخ طلبة برا " الله 40 واحد ماخذ اف "

    انا لحظتها ركبي مو قادرة تشيلني فرن تلفوني

    وكانت المفاااجأة


    كنت من أعلى الدرجااااااااااات


    ربي لك الحمد==


    فتغير الواقع من اني اعيد السنة الى اني اتغلب عليها واروح لثالثة

    ==========

    ووصلنا الفاينل

    وكنت تعبان ،،،،مرهق ،،،،مالي خلق ،،،ابي ارتاح ،،،ابي نقاهة

    لكن بالاصرار خلصنا من الفاينل وباقي النتايج

    وبيوم النتايج

    كان منظر الكلية مخيف ،،،،الدرجات من سابعه لي ثانيه تعلق تدريجيا بنفس الوقت

    وتسمع اليباب والصراخ ؛؛؛صرت دكتور يا جماااعه ؛؛؛

    وفلاشات الكاميرا …...

    فدار بيني وبين نفسي حديث

    : اليوم يا ارد البيت رافع راسي ومبشر اهلي

    او

    منزل راسي وخيبت كل الظنون في نفسي و من اهلي


    وتعلقت الدرجات وكانت المفاجأة


    ناااااجح رسميااا واروح لثالثة ---هياااااااااااااا



    ===============


    الخلاصة

    الدراسة تحتاج اول باول مو مثل اولى

    فقاعدة النجاح = التكرار + تدرس بسرعة


    1-التكرار : النوتة اللي تاخذها الصبح لازم ترد تدرسها

    وتحضر المحاضرات وتنوت لو تفهم 20٪ نعمة

    لان المعلومات يدد و كثيرة وساعات تخربط

    فلازم تكرر مرة بنفس اليوم/ ثاني مرة ويك اند/ ثالث مرة مراجعه قبل الامتحان بفتره

    الحين في ناس تسألني …اشحقه ادرس اكثر من مرة ماله داعي ؟

    الجواب سهل و معروف : لان المعلومات كثيرة وراح تنسى تنسى تنسى

    فتحتاج اكثر من مرة عشان ترسخ في ذهنك مو مثل الثنوي او سنه اولى

    هاذي هي طريقة الدراسه الــBasic عشان تنجح

    2-تدرس بسرعه : لانكم حاضرين المحاضرة الصبح فراح تردون تدرسونها بسرعه

    وجذي استغليتوا الوقت صح وعدل …وماضاع هدرا

    وحطوا ببالكم انكم اذا طولتوا ع نوته راح تملون وتزهقون وتنسون وتكرهون روحكم لوووول

    -------------------

    متفرقاااات :

    1- حافظوا ع رياضة المشي لو ساعه او نص ساعه بالاسبوع نعععمة

    تمشوا ب360 او الافنيوز عشان صحتكم و عشان تقللون الstress

    2- الاعتدال في العلاقات الاجتماعية :

    مو زوارة كل يوم "ولا" قطاعه مرة وحده

    لو برودكاست تدزونه واتساب اسبوعيا …يعطيكم العافية

    فالترويح عن النفس مهم مثل ما الدراسه مهمة ،،،،لانه احنا بالنهايه بشر

    نمل نتعب نزهق نحب نكره مالنا خلق

    ========


    في الختااام

    تذكروا انكم تحديتوا الكل عشان تدخلون الكلية

    فكان القبول ،،،،نسبه ثانويه +قدرات +منافسة سنه اولى

    نوعا ما مسستحيل

    لكن باصرانا كسرنا هالشي ودخلنا

    رغم اني من مدرسه حكوميه فكانت انجليزيتي لاتقارن بالانجلش سكول

    تذكروا هالشي دايما

    فانتم النخبة

    ولولا رضا الله سبحانه ثم رضا والديكم لما حققتم طموحكم

    =========

    اسأال الله لي ولكم التوفيق والسداد

    لما فيه خير وصلاح

    لنخدم ديننا ووطننا واهلنا

    دمتم بود

    اخووكم / مجند طبي​
     
  2. مقيدة

    مقيدة

    Trainee
    Joined:
    ‏17/7/14
    Messages:
    4
    السلام عليكم ..
    يعطيك العافية ..و مبروك النجاح
    و صراحة طمنتني ..
    أما لحظة اليأس فالكل يصير في هالشي
    و الله يوفقك و يقدرك تكمل باجي السنين
     
  3. Dr.ParroT

    Dr.ParroT

    Staff Member Consultant
    Joined:
    ‏20/7/13
    Messages:
    138
    أسلوبك مميز بالكتابه .. ما شاء الله ..

    يعطيك العافيـة على مشاركتك لنا لتجربتك الدراسية بسنة ثانية .. الأكيد الكل راح يستفيد :)

    مبروك النجاح وعقبال التميز يا رب

    كل التوفيق لك ولباقي الزملاء
     
  4. مجند طبي

    مجند طبي

    Trainee
    Joined:
    ‏16/7/14
    Messages:
    30

    اكيد هاذي طب لازم نستفيد من تجارب بعض :)

    الله يعافيج و بالتوفيق دكتورة
     
  5. مجند طبي

    مجند طبي

    Trainee
    Joined:
    ‏16/7/14
    Messages:
    30
    مشكور على التشجيع:blush: ...واحنا حاضرين للزملاء..عسى الله يوفقنا ويوفقهم
     
  6. purple heart

    purple heart

    Staff Member Consultant
    Joined:
    ‏27/7/13
    Messages:
    95

    ما شاء الله تبارك الرحمن
    الموضوع حييييل عجبني بدون اي مجاملة
    وقصتك اعجب واعجب
    اسلوبك وايد يشد..دمجت تجربتك مع نصايح

    اكثر نصيحتين يفيدون الطلبة:

    1- ان في فرق كبير بين سنة اولى وثانية وانها الطب الفعلي

    2- ان النوت والمعلومات يبيلها تكرار لأنها يديدة تماما ! يبيلها تثبيت

    هالشي مو بس يساعدك انك اتيب درجات بامتحانات السنة..حتى الفاينل ! بحيث انك خلاص بس تراجع بالفاينل وانت حافظ اغلب المعلومات

    والفاينل حيل مهم عليه 60% من السنة خصوصا بسنة ثانية


    الله يعطيك العافية وتسلم ايدك
    ومبروووك عليييك النجاح والانجاز

    موفق لكل خير
     
  7. مجند طبي

    مجند طبي

    Trainee
    Joined:
    ‏16/7/14
    Messages:
    30

    الله يعافيج دكتورة ويبارك فيج

    ..وجزاج الله خير....


    .أسعدني مرورج :)
     

Share This Page