09' موضوع شامل عن سنة أولى (الكورس الأول)

Discussion in 'السنة التمهيدية | سنة أولى' started by purple heart, ‏7/1/14.

  1. purple heart

    purple heart

    Staff Member Consultant
    Joined:
    ‏27/7/13
    Messages:
    95
    بسم الله الرحمن الرحيم

    السلام عليكم ورحمة الله وبركاته


    اول شي احب ابارك لكل خواتي واخواني اللي تم قبولهم بمركز العلوم الطبية وعسى الله يوفقكم ويسهل عليكم

    هذا الموضوع اللي سبق ووعدتكم فيه واعتذر عن تأخيري لظروف خارج عن ارادتي وباذن الله راح يكون شامل عن السنة التمهيدية واي سؤال عنها انا حاضرة وزملائي انا واثقة مراح يقصرون معاكم =)


    هالموضوع كتبته من اللي شفته بدفعتي 09' بس .. قد يكون في تغيير بجم شغلة بسيطة حق دفعتكم ما يندرا .. بس هذي الاساسيات .. وهذا جزء من كلام الطلبة الكبار اللي قالوه لنا .. والأغلب صار نفسه بالضبط


    بالنسبة للكورس الأول راح يكون في خمس مواد

    Biophysics + biochemistry + English 181 +computer + مادة اختيارية


    لرؤية الموضوع الخاص بالمواد الاختيارية اضغط هنا



    نبذة عامة عن الكورس الأول


    الكورس الأول واااااااايد مهم ... لأنه له أثر كبير على المعدل وخصوصا انه مواده اسهل فحاول قد ما تقدر انه تشد حيلك وتحصل على أعلى الدرجات .. وان شاء الله هالشي بيكون سهل لأنه هالمواد اغلبهااااا ماخذينها بالثانوية لكن اليديد انه بالانقليزي وجم موضوع بسيط ربطوه بالطب ..

    نظموا وقتكم عدل .. واحسن وقت للدراسة اهوه الويك اند .. قوموا من الساعة 8 واستغلوه عدل .. عشان الظهر او بالليل .. تروحون زوارات أهلكم ..وهم تطلعون مع ربعكم وتستانسون ..


    لا تسمعون كلام الناس انه الطب حكرة .. وماكو طلعات .. غلط بغلط .. ادرس واطلع ... ومو كل يوم لااااازم تدرس ... لا عادي في ايام الصراحة اطنش .. بس عقب قلبي يعورني لووول ...وفي ساعات مالك خلق بس تحل هوم ورك الانقليش


    حاولوا تستغلون وقت البريك بالجامعة .. يعني مو كل بريك ضحك وسوالف وأكل لووول ... مرة جذي ومرة جذي .. اخذ لك نوتة مثلا واقعد خططها .. احفظ جم كلمة من الفوكابلاري وجذي




    فكرة الريسيت أو اختبار الاعادة


    هالاختبار يكون بالفاينل .. مثل فرصة لمن اخذ قريد من C- الى F وان شاء الله ما تكونون منهم ... عشان ترفع معدلك ,,, وللعلم اي شخص خذا بالفاينل او بالريسيت F للأسف راح يتعرض للطرد من مركز العلوم الطبية من اي مادة حتى لو كان عليها وحدة واحدة والباجي كلهم A ...

    ونقطة مهمة .. باختبار الريسيت لااااااا يمكن انك تأخذ أعلى من C حتى لو مأخذ بالفاينل والميدتيرم فل مارك راح تصير C لأنه بكل بساطة مأخذ ريسيت

    ولو خذيت ريسيت راح تحذف درجتك اللي يبتها بامتحانك الاساسي ويحطون لك مالت الريسيت ...

    مثال : خذيت بامتحانك الفاينل D + وما عجبتك .. لا قدر الله يبت بالريسيت D- خلاص درجتك راح تصير D- ولا يمكن ترجع القديمة

    وللعلم يقولون الريسيت دايما أصعب من الاختبار الاساسي






    طريقتي في دراسة اي نوتة


    لان حفظي صعب ..فكنت اتبع هالطريقة صج اني اطول ..بس اضمن انه المعلومة راح تثبت واكون فاهمتها عدل .. والنوتة عبارة عن سلايدات المحاضرة اللي الدكتور يشرحها .. تنطبع على الورق .. واهيه عبارة عن ملخص لأهم النقاط الموجودة بالمحاضرة

    1- اقراها + اترجم + اخطط فقط
    2- افهمها بس
    3- احفظها عدل
    4- مراجعة بس قوية
    5- مراجعة الامتحان






    نبدي بال computer


    1 credit

    عدد المحاضرات :

    1 بالأسبوع ( مرات تكون محاضرة .. والباجي اغلبهم عملي وراح يعطونكم جدول بمواعيدهم )

    كتابها يعطيكم اياه المركز نفسه ماله داعي تشترونه



    مواضيع المادة :

    عبارة عن فصل عن الويندوز ونظامه وعن السيديات ومعلومات عامة عنهم وبعدين راح تبدون بالبرامج .. وورد + باور بوينت + اكسل +رفرنس مانيجر

    طريقة الامتحانات :

    راح يكونون امتحانين .. ميد تيرم + فاينل

    الميدتيرم راح يكون جزء منه اختياري وجزء منه مقالي

    الفاينل ما فيه كتابة كللللله عملي




    نصايح :

    1- دكتور المادة يحب ايب أسئلة من الكلام اللي يقوله بالمحاضرة وخاصة بالأمثلة يعني مهم التنويت حيل
    2- بالاضافة حتى بالتطبيق العملي يقولون كلام ايي بالامتحان
    3- مهم حفظ معنى الاختصارات يعني CPU = central processing unit
    4- بامتحان الفاينل حاول ان تطيييير بالتطبيق لانه احتمال يعلق عليك الكمبيوتر وكمية التطبيق راح تكون كبيرة وللأسف الوقت شوية ... فحتى لو كان شغلك صح وعلق عليك مراح يعطونك وقت اضافي
    5- ومهم حق العملي اني احفظ التاب بالبرنامج حق شنو ؟؟ عشان استغل الوقت بسرعة ما اقعد الف وادور عشان القى اداتي اللي ابيها
    6- اي خطوة اسويها ببرنامج الريفرنس مانيجر لااااازم احفظها








    Biophysics


    3 credits

    عدد المحاضرات :

    وحدة محاضرة عادية + وحدة وورك شوب


    الورك شوب ( عبارة عن نوتة فيها اسئلة تشابه طريقة اسئلة الامتحان وبعضهم راح تتكرر فكرتهم او حتى نفسهم بالضبط .. راح تقعدون طول المحاضرة تحلون اسئلة منها مع الدكتور وتناقشون فكرتها واللي ما فهم يقدر يسأل )



    نبذة عنها :


    اذا كنت تكره الفيزيا بالثانوية مثلي .. فلا تيأس راح تحبهااااا هني وتيب فيها درجة حلوة بأذن الله


    مواضيعها حلووووووة وبسيطة ... وحتى قوانينها بسيطة مالت السرعة والتردد ... تتكلم عن الضوء والصوت .. وعن شنو داخل الاجهزة اللي نستخدمها بالضبط .. الأشعة .. الأمراي ...العدسات ..

    يعني جد حبيتها ... ويقولون الدكتور حبوب .. عادي يشرح بالعربي ويعطي بونسات ... يضحك ويتغشمر .. طيب .. لكن لاااا يعصب عليكم .... احنا عصب وكليناها بالميدتيرم يالنا صعب

    لكن المشكلة تطول المحاضرة من كثر الاسئلة

    بس سهلة الحمد لله




    طريقة الامتحانات :

    1 ميدتيرم 40% و1 فاينل 60 % وكلهم طبعا نظام ال mcq اختياري


    طريقتي بالدراسة :

    يوم اليمعة الصبح تقوم مبجر الساعة 8 .. وتدرس النوتة اللي خذيتها هالأسبوع كلهااا .. تفهمها وتحفظها .. وعقب ما تخلص .. ترتاح شوي .. وعقب تحل اسئلة الهوم ورك اللي موجودة على النوتة .. بروووحك ...وعقب تتأكد من الاجابات من على الموقع ... وتصلح حق روحك

    الغلطة اول شي لازم تحاول من نفسك تعرف شلون تصلحها .. واذا ما قدرت .. عندك الدكتور ما يقصر .. حتى مستر جونيد ..وحتى بالدورات حييييل مهمة .. احس وايد استفدت منها


    دراسة الامتحان

    .. ممكن تقسم وقتك قبل الامتحان بجم يوم ...كل يوم تخلص فيه نوتتين مثلا مع كل شي .. وحفظ تام ... بس قبل الامتحان بيوم تراجع كل شي على السريع لأنك سبق ودرستهم وحدة وحدة وعدل ..غير طبعا دراستك اللي من قبل خلصت فيها كل ويك اند ...وممكن بعد مرة ثالثة


    ولا تنسون التكرار يعلم الشطار لووول .. وغير هذا حضروا الدورات مالت كل نوتة .. زيادة الخير خيرين ... وطبعا شي راجع لكم في طلبة ما يحبون يحضرون


    بس راح يدخل عليكم تقريبا بس 4 كاترة .. وغير هذا في جم مرة راح ايب لكم دكتور المادة دكاترة من برة .. ويأخذون تقريبا ساعة من وقت المحاضرة او كلها .. يعطونكم معلومات زيادة عن اللي قاعدين تأخذونه .. وانتوا مو مطالبين فيها بالامتحان .. لكن احتياطي سئلوا يمكن هالسنة الدكتور يغير النظام ويدخل المحاضرة الخارجية بالامتحان



    نصايح :

    1- احسن لك أقرا النوتة قبل ما تدخل المحاضرة .. عشان لا تضيع بالمحاضرة وتعرف عن شنو قاعد يتكلم الدكتور
    2- عادي مو الا تدرس يوم بيوم لأنها مرة بس بالأسبوع
    3- لو شكيت باجابة سؤال بالهوم ورك .. وحسيت انه اجابتك صح .. ترى عادي ممكن يكون الجواب غلط بالموقع .. اسأل الدكتور ومستر جونيد
    4- نوت مع الدكتور وساعات يقول عن الاشياء المهمة
    5- دكتور شريف عجيييب ... اذا قال لكم مو الا تحفطون هالحجي صج لا تحفظون ...بس لا تزعجونه وتقرقون عشان ساعات يقط عليكم سؤال يقول ممكن ايبه ومهم .. يعني راح ايبه لوول
    6- الكتاب .. اغلب الطلبة الكبار قالوا لا تشترونه ما منه فايدة .. كل شي موجود بالنوت والوورك شوب والهوم ورك .. وانا صج ما شريته والله لي يومكم حتى شكله ما اعرفه وطلعت ب A-
    7- ليلة الامتحان .. يعني مثلا امتحانكم الساعة وحدة الظهر ... قوموا الصبح مبجر .. لا تقعدون تفجون كل النوت !!! مراح يمدي .. بس فجوا اسئلة الهوم ورك والورك شوب وراجعوا .. جذي جنكم راجعتوا اهم النقاط بكل النوت .. وراجعوا الاشياء اللي تواجهون صعوبة فيها
    8- مهم حفظ القوانين ومتى استعمالها ..وحق شنو
    9- مهم حفظ التحويل بين وحدات القياس كلهم ... لأنه الدكتور ممكن يخلي الاجابة الصح موجودة لكن بوحدة ثانية مو مثل المحلولة ..






    English 181

    5 credits

    هالمادة وااااااايد مهمة .. تلعب بالمعدل لعب ...لأنه اكثر شي عليها .. تأسسكم حق الجامعة عدل ... وطبعا كل انقليزيها طبي



    نصايح عامة :


    1- من بداية الكورس .. اي كلمة يديدة تسمعها اثناء المحاضرة او تقراها باي براكتس او اي مكان وما عرفت معناها .. على طول سجلها بورقة عندك وبأول ما ترجع البيت حاول تطلع معناها وتحفظها .. عشان تساعدك بعدين بالفهم حق الريدينق

    2- مهم تحطون فايل خاص بالانقليش .. اخذوا اللي من داخل فيه فواصل .. عشان تحطون كل ورقة بقسمها .. لأنه راح يعطونكم اوراق وااايد
    3- التزم بالقواعد الخاصة لمدرسك .. ولا تأخذ اي ورقة من كلاس انقليش ثاني يمكن مدرسك ما يرضى بقواعد غيره .. انت تحسب انك راح تستفيد لكن للأسف الله لا يقوله ممكن ما يعجبه وينقصك عليه



    هالمادة تنقسم الى :


    [Vocablary]


    طبعا راح تكون دراسته اعتماد كلي عليكم .. الدكتور ما راح يتكلم عنه بولا شي .. اللهم امتحانكم بتاريخ كذا من هالصفحة لي هالصفحة .. وانه اختياري ... الباجي تنظيم الوقت والحل كله عليكم .. يعني اهوه سهل ..بس كمية المعلومات كبيرة شوي ..وحرام اللي ما ايب فيه درجات زينة لأنه حده مضمون اذا درست له عدل !! لا تهملونه خلوه أول بأول ..قبل لا تنام اقرا منه .. يت الصبح مبجر قبل المحاضرة اقعد اقرا بالكلمات والمعلومات ..يعني الأفضل انه يوميا تخصص لك وقت بسيط حقه .. ما ياخذ وايد



    1- كتاب الفوكابلاري


    عبارة عن كتاب فيه تحفظ الكلمات الطبية بصورة حلوة ... انه حاطين لك اياهم على شكل اسئلة والغاز ..والجواب اهوه الكلمة اليديدة .. طبعا تعرف الاجابات الصحيحة من نهاية الكتاب ورا ..


    احسن طريقة للدراسة منه ... انك تعبي كل الفراغات بالاجابات الصحيحة ..والكلمات اللي ما فهمتهم ترجمهم .. سواء كانت بالفراغ او السؤال نفسه ...وعقب تدرس الكتاب ككل ... حتى بمعلوماته ... وتحفظهم !!


    طريقة امتحان الفوكابلاري


    ... راح ايبون لك اسئلة هم mcq ...والجواب قد يكون من الكلمات اليديدة اللي حطيتهم بالفراغ .. او حتى بالمعلومات الموجودة بالكتاب ممكن تنسئل عنهم .. اعتقد بس مو متأكدة انه العدد الكلي حق الأسئلة 50 .. 40 من الكتاب .. وال10 الباجي من الجنرال فوكابلاري ..


    راح يكون امتحانين واحد بنص الكورس والثاني بالفاينل ..وكل واحد عليه 5% يعني التوتل 10% =)



    2- الجنرال فوكابلاري : تدرس من لستة الكلمات الموجودة في الكتاب الأساسي عند كل writing (اهمه نفسهم الكلمات اليدد اللي حاطين معانيهم فوق)



    لأن ساعات الكلمات يكون لها اكثر من معنى .. فشلون تعرف المعنى المطلوب ؟؟ تعرفه من الكتاب =)



    [Writing]


    راح تكتبون بس فقرة وحدة !!!


    اول موضوعة بأول الاسابيع تكون عبارة عن process عملية ( فيها التحضير والعملية الأساسية والبوست كير) 5%


    عقبها ال deffinitionمرض ( اعراضه وطرق انتشاره.. اسبابه .. علاجه ) 10%


    واخر شي compare and contrastمقارنة بين مرضين ..


    طبعا كل هالاشياء راح تنشرح شنو يعني بالضبط .. ولا تحاتون الدكاترة راح يدرسونكم بكل شي عنهم من الألف لي الياء وراح تتدربون وايد على الكتابة .. وعادي تسئلونهم بالكلاس او الأوفيس أور ..ممكن تحلون تدريب جماعي ..وهم راح تسوون براكتيس اكزام


    استفيد من كل تدريب ولا تستهين فيهم .. واهم شي تعلم من أخطائك وباذن الله راح تتطور


    والطريقة انهم راح يعطونكم اوت لاين فيه مقدمة عن الشي اللي راح تكتبون عنه


    وعقب مجموعة جمل غير مكتملة .. انت كل اللي عليك تعرف هل هذي تعريف ؟؟ وظيفة .. او جملة عادية .. راح تكملها بصيغة انقليزية صحيحة يعني هم القواعد لازم تكون صح وتصير كاملة ..ممكن تدمج بعض من هذي الجمل .. شوي تعيد ترتيبها اذا احتاج .. بس غالبا يكون نفس الترتيب ...



    من أول يوم تداوم فيه بالانقليش .. خل عندك جم ورقة فاضية خاصة بقوانين دكتورك حق الكتابة ..لأنه شوي تختلف من دكتور لي ثاني .. تحط شنو يحب دكتورك .. يحب هالكونيكتر ... يحب هالنوع من الجمل ... هالاداة عنده تحتاج فاصلة قبلها او عقبها .. اشياء كله تغلط فيها .. فتحطها عشان تتذكرها .. وكل ما تسمع اثناء المحاضرة شي تظن انه راح يفيدك بالكتابة .. على طول حطها بالأوراق ..وخل هالأوراق مختلفة ..3 اجزاء .. مرة حق البروسيس .. ومرة حق الدفنيشن .. ومرة حق الكومبير وكونتراست ..




    Reading


    نفس الكومبريهنشن مال المتوسط والثانوي بالضبط .. لكن الاختلاف انه طبي واطول .. وشوي أسئلتهم صعبة لازم تدقق فيهم .. وممكن اكثر من اجابة صح يكونون قراب حيييل من بعض



    [Listening]

    اهوه جزء من امتحان الميدتيرم والفاينل


    راح يوزعون عليكم بالامتحان اوراق فاضية عشان تنوتون فيها .. ومع ورقة الامتحان


    ورقة الامتحان راح يكون فيها بس تعليمات الامتحان بالاضافة الى عنوان الفقرة اللي راح يقولها الدكتور .. واجابات الاسئلة ... راح تكون طبعا على شكل mcq .. يعني الاسئلة مو موجودة


    الفقرة ممكن تكون عبارة عن process او deffinition او compare and contrast



    فكل اللي عليك تنوت وتستمع وتفهم .. الفقرة راح تنقرا مرتين .. وبعدين هم الاسئلة راح تنقرا مرتين



    طبعا اللسننق يعتمد على كل واحد وطريقته اللي يفضلها .. طبعا حاول من بداية السنة انك تبحث عن الطريقة اللي تناسبك .. في كل براكتيس يسويه الدكتور جرب .. وممكن تستفيد من طرق غيرك وتناسبك .. المهم الفرصة كبيرة حاول انك تستغلها قد ما تقدر .. مو تطنش .. وايي يوم الامتحان وتتوهق لأنك مو عارف طريقة التنويت


    طريقتي كانت


    يعني بالبداية نوت كل اللي تقدر عليه .. والمرة الياية حط النواقص .. وبلون غير


    لكن بما انك اول مرة سمعت اغلب القطعة ونوتها ... بالقراءة الثانية يبقى لك اشياء بسيطة تنوتها .. حاول تستغل هالوقت بالاستماع والفهم ...


    وترا مو كل شي يتنوت ...الأشياء اللي انتي عارفتها مثل المعلومات العامة .. ماله داعي تكتبها . وخاصة انك مدرسة حكومة فتأخذ وقت بالكتابة بالانجليزي


    والمعلومات العامة اقصد .. مثلا يعطونك سبب البنج .. او وظيفة الأنتي سبتيك .. او وظيفة الاعضاء المعروفة


    وفي طريقة اسويها انه اذا بيحطون لي اسامي ادوية صعبة ...اكتبها بالعربي بس بمعنى انقليزي ... يعني مثلا بدال paracetmol ,, تصير براستمول ... جذي اسرع ... او حتى الأعراض الصعبة اكتبها بعربي مقلز



    ولما يعطونك الدقيقتين مالت قراءة الأسئلة بالبداية ... حاول تعرف انه شنو يبون ... عشان تركز عليه وانت تسمع .. مثل النسب .. الأعراض ... طريقة العلاج .. اسم المكتشف ...التاريخ .. وهالشي تعرفه طبعا من الأجوبة


    وهم لما يقرون السؤال .. ماله داعي تكتبه كله .. كلمة كلمة وحرف حرف .. مثلا بس اكتب which true .... يعني الكي وورد ... وبالوقت هذا حاول تدور الاجابة من اللي نوته




    [Grammer]


    ممكن تدرسها من كتاب ايزار .. في امثلة وايد ..اهوه وايد مفيد حق الضعاف بالقرامر ...انا وحدة الصراحة ما جسته وأوراق المس مالتي كانت حييييل كافية .. لدرجة انه في مثال من جملها الموجودة بالاكسرسايز يت بالضبط بالامتحان !!!


    اول امتحان راح يكون مع الفوكابلاري وعليه 5% واهمه 10 اسئلة هم mcq


    ثاني امتحان راح يكون مع الفاينل جذي يمكن 10 اسئلة راح يضيفونها عقب الريدينق


    القرامر طريقة اسئلته راح تكون عبارة عن جمل ..وراح يحطون خط تحت اربع كلمات وتحتهم a , b . c . d واخر حرف e راح يكون بعيد


    انت راح تختار واحد من الاربعة الاحرف على اساس انه هالكلمة فيها غلط سواء بالقواعد انه ناقصها s او جمع او مفرد .. او بالتصريف مالها .. او حتى اذا ناقص قبلها فاصلة او بعدها .. او سمي كولون ; ) عقب راح تتعرفون عليها وعلى شروطها)


    وممكن تكون الجملة كلها صحيحة فتختار حرف ال e ... وطبعا شرط لازم تختار اجابة وحدة .. واكيد اكيد .. اجابة وحدة صح =)






    Chemistry


    3 credits


    كل جم محاضرة راح يدخل عليكم دكتور يديد .. يعطيكم الجزء اللي اهوه متخصص فيه .. وبعدين اهوه راح يحط مجموعة أسئلة على اللي شرحه بالامتحان ..مواضيع المادة .. بكل بساطة راح تعيدون كلللل شي خذيتوه بالثانوية مال الكيميا .. بس بالانقليزي .. بالاضافة الى جم معلومة بسيطة يديدة .. وجزء العضوية هم راح تعيدون مال الثانوية .. لكن راح تتعمقون فيه اكثر بمواضيع الطب .. وفي جزء يديد فيه





    طريقة الامتحانات


    هم امتحانين .. ميدتيرم + فاينل .. قد يكون 30% والثاني 70% او 40% والفاينل 60% راح يبلغكم الدكتور بأول المحاضرات .. ولو حبيتوا تعترضون وتغيرون ممكن هالشي يصير .. بس لازم كلللل طلبة الدفعة يوقعون على الموافقة .. ومن ثم القسم ممكن يوافق او يرفض





    Lab chemistry



    عليه 5% للأنه راح تأخذون 5 لابات وكل واحد عليه درجة وحدة .. حدههه سهل ... والنوتة تأخذونها من بو طلال .. واهمه بعد داخل اللاب ممكن يعطونكم هاند اوت ثانية بس تقريبا نفس المضمون اول شي تقريبا ساعة الا ربع راح يقولون لكم عن شنو تجربة اليوم .....وشنو بالضبط راح تسوون فيها .. وعادي تسئلون ...وعقب راح تشتغلون بنفسكم ..ولا تحاتون تقدرون تسئلون وعادي الوضع سهالات .. واذا خلصتوا ..راح يعطونكم نفس التجربة بس بمركبات ثانية وورقة لازم تحلونها وبروحكم .. وهذي عليها ال 1%


    واللي يدرسونكم باللاب حدهم طيبيييييين .. وعادي لو اتيلهم بالمكتب وقت البريك يشرحون لك شي ما فهمته من محاضراتك الأساسية


    لا تستهينون باللاب !!! ترا لازم ايبون خمس اسئلة منهم بالميدتيرم وعشرة بالفاينل .. هذيل درجتهم طبعا غير عن ال5%


    مو مثل الثانوية لعب كله ما ايي لوول .. في بنات طنشوهم وكلوها بالامتحان .. يعني حرام تقدر تضمنهم ..


    واهم شي لا تنسى اللاب كوت =)





    نصايح :


    1- دراسة الكمستري يبيلها أول بأول ... ويفضل لو قبل ما تحضر المحاضرة .. تقرا النوتة لنفس سبب الفيزيا

    2- في دكتور اسمه محمود... يابته اذكر جمعية مركز العلوم الطبية .. يسوي دورات لكن برسوم ..بس بسيطة سعرها يعني ... عجيييييييبة ... ما شاء الله عليه مبدع .. يعطيك شنو المهم وشنو اللي مو مهم .. وكل كلامه اللي قاله لنا والله يا بالامتحان.. ونصايحه عجييييبة ...وهم يعطيك شنو أحسن طريقة تحل السؤال وبسرعة ...ما قصر معانا .. يمكن شوي تستغربون من طريقته انه جدي .. ودايركت .. بس عجيييييييب ... ليلحين ما انسى ضحكته .. خخخخخخ جذي تخرع هههههههه .. فسئلوا عنه ولا تطوووفكم .. وحنوا عليهم ايبونه لكم
    3- اذا في شي ما فهمتوه .. ضروري تسئلون عنه .. لأنه اذكر لما شفت شي صعب وما فهمته .. طنشته .. القاه موجود بالامتحان !! لووول
    4- الدكتورة مي تقول بس كافي نوتي ماله داعي تفتحون الكتاب .. فجأة تلقون اسئلة موجودة اجابتها بالكتاب مو بالنوت !!! فالكتاب مهم لجزئها
    5- مهمة الاسئلة الموجودة بآآآخر الكتاب
    6- حفظ المعادلات الخاصة بألفا وبيتا وجاما ..وشلون اطلع الجواب
    7- اذا في عندك معلومات مطلوب حفظها .. وكلهم متعلقين ببعض مع الاختلافات وهم فيه تشابه .. حاول تيمع كل هالجزئية بمجموعة اوراق .. ورتب المعلومات المتعلقة فيهم على شكل جدول .. ولونها بألوان وحط عليها حركات علشان تسهل عليك حفظها



    مثال : الجزء المتعلق بالعضوية لدكتور اسلام خان


    انواع السكر ... مهم حفظ انواع الروابط داخل انواع السكر وحق شنو استخدمهم وشنو اساميهم الثانية وشنو نوع الرابطة ورقمها .. يعني معلومات وايد وممكن اتخلبط .. والمشكلة انهم اكيييييد بالامتحان


    لا تخافون حدهم سهلييييين وجاوبت عليهم كلهم صح بالامتحان بعد ما سويت الجدول =)



    8- في ناس يقولون دراسة النوت كافية ... وفي ناس لا درسوا من الكتاب .. وانا اشوف الصراحة اللي درسوا من الكتاب يابوا درجات واااايد زينة ..انا عن نفسي ما احب الكتب احب الملخص مال النوت .. ومقتنعة بقريدي B+ .. اصلا احس ما كان في وقت .. وفي ناس درسوا من النوت وفهموها بكافة تفاصليها هم يابوا درجات واااايد زينة


    9- عند دراستك للامتحان اللي يكون قبله بفترة يعني مثلا باسبوع واللي اهيه المبدئية..اذا خلصت .. لا تنسى تفتح اسئلة القوائم ..اقعد حلهم .. واللي ما عرفت له او شكيت فيه ..حط عليه علامة وكمل .. اذا خلصت حل .. اقعد صلح حق روحك .. اللي غلط تعلم من غلطتك واللي شاك فيه .. راح تعرف انه دراستك لهالجزء كانت ضعيفة فلازم ترد تدرسها مرة ثانية



    هالأسئلة واااايد مهمة لأنه والله تكررت !! جم سؤال من القوائم والله اذكر بالضبط يت بالامتحان .. بالملي !! وغير هذا تنبهك على اشياء تحسب انها فهم بس اخر شي تطلع لازم حفظ .. ساعات يطلع الاجابة غلط تأكدوا من القائمة نفسها ..وديروا بااااالكم تورونها الدكتور !! اذا في شي ما فهمتوه سئلوا ربعكم او القائمة نفسها اللي سوت السؤال ...اذا شافها الدكتور القائمة تروح فيها وانتوا بعد اسم الله عليكم كلكم لووول ... ممكن يصعب الامتحان ..وصج صارت سمعنا وايد حجي



    نصايح عامة :


    1- اشتر الاطلس الالكتروني الطبي .. وااااايد زين .. يفيدك بالفهم حق الانقليش .. وحتى عشان تترجم كلمات صعبة من اي نوتة ..وطبعا اهوه له اكثر من جهاز ..المهم انه فيه الطبي .. تبي ابيض بأسود .. تبي ملون .. شاشة كشخة لوول تختار اللي يريحك .. هذا رقم محل يوصل لك لي البيت ومعاه كفالة 22436606

    او ممكن تشتريه من العجيري جنه ..وهم بالكلية راح ايبون راعي المحل نفسه داخل الكلية ويعرض لك اجهزته .. لكن شوي ممكن يتأخر مو بداية الدوام

    2- اذا شريت الكتب لا تنسى تحتفظ بالفاتورة .. لأنه احتمال على نهاية الكورس يطلبونها منكم عشان راح تسوي القائمة خصم قد يكون 50% او 100% يعني ترجع كل فلوسك ويصير ببلاش لوول

    3- الكتب اكيد راح تسوي الكلية معرض داخلها .. تيب لكم كل الكتب اللي راح تحتاجونها .. واذا ما قدرت ممكن الرابطة تتكفل واتيبهم لكم ... او ممكن تشتريهم من مكتبة الطالب الموجودة بشويخ صوب المكان اللي سجلتوا فيه



    وبجذي انا خلصت كلامي .. وان شاء الله يكون شرحي كافي ووافي عن الكورس الأول


    ومرة ثانية اعتذر عن التأخير



    كلمة اخيرة ..


    من طلب العلا سهر الليالي .. وانتوا باذن الله مو قاعدين تطلبون اي شي .. قاعدين تطلبون انكم تصيرون دكاترة .. يعني بعد الله سبحانه وتعالي .. أرواح الناس راح تكون بيدكم ..راح تلبسون اللاب كوت الأبيض ..وحتى الصيادلة ..بتصنعون الأدوية ...وبتساعدون بشفاء الناس .. فأكيد لازم تتعبون .. ومن جد وجد ...وكل الدراسات لابد الواحد يتعب فيهم عشان عقب يحس بفرحة درجته لما تطلع .. ربي ما يضيع تعب أحد .. انا اقولكم الصج .. انا مو طول هالمدة قوية وضامنة قبولي ... لا ..يعني انا يتني اوقات يأست فيها .. لكن رديت قمت وأقوى من أول .. بجيت .. تضايقت ..لكن بالمقابل هم فرحت لما شفت النتيجة .. وصدقوني الفرحة محت كل شي ..لأني الحمد لله نلت اللي ابيه .. وكل تعبي ما ضاع


    وانتوا قدها باذن الله .. وعسى ربي يكتب اللي فيه الخير لكم

    واي سؤال انا حاضرة .. سامحوني على القصور

    بالتوفيق للجميع
     

Share This Page