مواد الفصل الأول للسنة التأسيسية [ الطب - الأسنان ] في جامعة الشارقة

Discussion in 'الدراسة في الإمـارات' started by UoS Student, ‏17/7/18.

  1. UoS Student

    UoS Student Trainee

    Joined:
    ‏7/8/18
    Messages:
    5
    مرحباً جميعاً :heartbeat:
    أولاً أحب أبارك لكل اللي انقبلوا طب أو طب أسنان في جامعة الشارقة✨
    ألف مبروك و الله يجعلها بداية انطلاقة لكلّ خير و عطاء

    في هذا الموضوع حابّة أتكلم بشكل مفصّل عن السنة التأسيسية في جامعة الشارقة و بحاول قد ما أقدر أكون موضوعية و أبعد عن رأيي و تجربتي الخاصّة حتى ما أبخس بعض الأشياء حقها أو أعطيكم تصوّر ربما يكون مختلف عن الواقع و اسأل الله أن يعيني على ذلك ..

    قبل كل شي في أكثر من نقطة حابّة أوصلها لأنها ملتبسة عند الكثير ..

    ١- ماهي سنة "الفاونديشن"/ "التأسيسية" Foundation year ؟

    الكثير يعتقد إن سنة الفاونديشن اهي سنة لغة و هذا شيء خاطئ تماماً
    السنة التأسيسية عبارة عن سنة تنافسية كاملة يدخلها الطلّاب اللي ينقبلون في الكليّات الطبيّة ( طب / طب أسنان ) و يدرسون فيها مقررات كثيرة للعلوم و اللغة الإنجليزية و مواد طبيّة و لازم يجتازها الطالب بمعدّل عالي عشان ينتقل للسنة الثانية

    الجامعة ما تعتبر سنة الفاونديشن من ضمن سنوات الدراسة في كليّة الطب أو الأسنان
    لذلك اللي يجتازونها ينتقلون للسنة الأولى الفعلية في كليّاتهم
    فعلى هالأساس تكون سنوات الدراسة كالتالي :
    فاونديشن + ٥ سنوات طب / طب أسنان

    بالبداية و قبل لا أتكلم عن شيء لابد تعرفون إن الجامعة تلزم الطالب بمقررات عامة لجميع طلاب الجامعة
    ١٥ وحدة إلزامية و ٩ وحدات اختيارية

    و تختلف المواد الإلزامية من كليّة لأخرى داخل الجامعة

    على سبيل المثال طلاب الكليات الطبية لازم ياخذون مقرر الIT بالإنجليزي بينما طلاب الآداب ياخذونها بالعربي ، طلاب الطب ملزمين بمادة ( لغة إنجليزية للعلوم الطبيّة أو medical terminology ) بينما طلاب الشريعة و القانون مثلاً ياخذون إنجليزي عادي و هكذا

    لكن كل الطلاب الجامعة ملزمين باجتياز هذي المواد قبل تخرجهم

    لكن في متطلبات ضرورية لطلبة الفاونديشن ( طب و طب أسنان ) لازم ياخذونها و هي

    1- Physics for medical sciences
    فيزياء للعلوم الطبية ٣ وحدات

    2-Physics lab for medical sciences
    مختبر الفيزياء للعلوم الطبية ١ وحدة

    3- Medical education "Dent / Med"
    التعليم الطبي ٣ وحدات

    و هالمادة هي الوحيدة اللي تختلف بالفاونديشن فطلبة الطب فقط ياخذونها في كلية الطب و طلبة الأسنان فقط ياخذونها بالأسنان

    4- English for medical sciences "medical terminology"
    مادة المصطلحات الطبيّة ٣ وحدات

    هذي من المواد العامة ..

    أما مواد الفاونديشن الأساسية

    5- Chemistry1 for medical sciences
    كيمياء ١ للعلوم الطبية "٣ وحدات"

    6- Chemistry2 for medical sciences
    كيمياء٢ للعلوم الطبيّة " ٣ وحدات"

    7- Chemistry Lab for medical sciences
    مختبر الكيمياء للعلوم الطبيّة

    8 - Biology 1 أحياء١ "٣ وحدات"

    9- biology2 أحياء٢ "٤ وحدات"

    لازم الطالب ياخذ المواد هذي كلها في الفاونديشن
    لو في متطلب واحد ناقص ما يدخل ملفه اللجنة اللي تعقد نهاية السنة عشان يختارون الطلبة المقبولين للسنة التالية

    [​IMG]

    [​IMG]


    لكن في موضوع مهم :
    المعدل اللي بناءً عليه يحسم الأمر واللي لازم الطالب ياخذ فيه أعلى معدل يقدر عليه هو معدله في هالمواد
    Bio 1, 2
    Chem 1,2
    Chemistry Lab

    ١٤ وحدة بس
    لازم ياخذ فيهم أعلى قريد ممكن ياخذه لأنهم راح يوزعون و يقبلون الطلبة من أعلى معدل فيهم إلى أقل معدل

    :hand: طيب و باجي المواد ؟
    لازم ياخذها و يجتازها ، ما يشوفونها بالقبول
    بس لازم ياخذ فيهم (C+ (2.5 و فوق مو D
    لا تستهينون بهالموضوع لأن في حالات الطلبة ما اهتموا بباجي المواد مثلاً حصلوا D+ ومعدلهم العام نزل و صار ٢.٤ و ما دخلوا أوراقهم اللجنة رغم ان معدلاتهم بالاحياء و الكمياء ٣ !! فانتبهوا !!

    لازم المعدل العام اقل شي 2.5 << معدل كل المواد
    أما معدل مواد الاحياء و الكيمياء اكثر شي ممكن تاخذه

    كانت في إشاعة بين الطلبة إن في حال تساوو آخر ٢ مثلاً بمعدل مواد التنافس يشوفون معدلهم بالمواد الثانية و تتم المفاضلة على هالأساس
    لكن هالكلام غير صحيح على دفعتي آخر ٤ كانوا نفس المعدل و وخذوهم كلهم و صاروا المقبولين ١٠٤ بدل ١٠٠

    نبدأ بالكورس الأول :
    الكورس الأول راح تستلمون جدولكم جاهز أهم يسجلونكم
    راح تاخذون
    Biology 1
    Chemistry 1
    Physics
    Physics Lab
    Medical education
    Medical terminology
    أو
    مادة skill للطلبة اللي الآيلتس عندهم مو كامل



    Biology 1
    المادة مختلفة تماماً عن الأحياء العادي اللي درسناه بالثانوية
    راح تكون مفصّلة أكثر و أغلبها دراسة لأساسيات الأناتومي و الفسيولوجي للجسم ..

    عبارة عن ٧ جابترات من عدّة كتب + نوت إضافية الدكتور يعطيكم إياها

    الكتاب الأساسي للبايو ١ و ٢ :
    Essential of human anatomy and physiology - marieb, elaine N 11th edition

    تقسيمات الدرجات :
    20% quizzes
    20% midterms
    ( 10% lab ( 5% midterm, 5%lab final
    50% final
    المادة فيها جزء نظري و جزء عملي عليه ١٠٪
    جزء العملي راح تاخذون لاب يوم بالاسبوع اسبوع و ترك
    مو اسبوعياً و له دكتور ثاني غير عند دكتور النظري و فيه ميدتيرم و فاينل

    اللاب عباره عن histology علم الأنسجة
    تشوفون الأنسجة تحت المايكروسكوب و تتعرفون عليهم

    النظري :
    الامتحانات كلها MCQS اختيارية
    و عادة يكون سؤال أو سؤالين مقالي
    و يكون بسيط يعني الإجابة ما تتعدى السطر و السطرين

    المادة محتاجة تركيز و دراسة أول بأول
    خصوصاً إن اسئله الامتحانات راح تكون سهلة لكن الإجابات متقاربة جداً فتختارون الأصح
    تدربوا عليهم ترى وايد يكررون من الاسئله القديمة سألوا الطلبة اللي أكبر منكم عن الاسئله احنا كان عندنا درايڤ ينزلون فيه الدفعه كويزات قديمة و اسئله قديمة ( طبعاً لازم الدكاترة ما يدرون بهالشي لأن لو دروا بيصعبون الاسئله عليكم فلا تروحون تورونهم ) و كذلك في تست بانك للكتاب المقرر عليكم وايد حلو و يساعدكم تثبتون المعلومات ، أنا كنت اخلص دراسه و احل تست بانك الكتاب و بعدين افتح الاسئله القديمة بجذي تكونون غطيتوا كل شي .. في طلبة كانوا يدرسون اسئله من Quizlet يكتبون اسم الجابتر و تطلع لهم اسئله و فلاش كارت انا عن نفسي ماعرفه

    ملاحظة : لازم تراجعون أكثر من مرة
    دراسة المرة الوحدة أبداً ما تكفي راح تطير المعلومات منكم
    حتى لو واثقين ماعليه كرروا ..
    يمكم بالبداية بتستصعبون الموضوع لأن المرجع الوحيد اهو الكتاب و الكتاب ما نختلف بريف و شرحه سطحي لكن اذا مافهمتوا منه لا تعلقون عليه فتحوا يوتيوب مليان بشرح كل واحد أحسن من الثاني ، عادي غيروا طريقة دراستكم ليمن تستقرون على الطريقة المناسبة ، و لا تستحون أبداً أبداً روحوا سألوا الدكاترة عن الأشياء اللي مو فاهمينها عادي قولوا لهم احنا كنا مدارس عربية و محتاجين وقت على ما نتأقلم أبداً ما يقصرون معاكم خصوصاً د.عصام و د.مها حيل صدرهم رحب للاسئلة



    شرح مفصل للمادة :

    الفصل الأول

    عبارة عن مقدمة عن أجزاء الجسم و تفصيل كل منطقة و مسميّات anatomy positions
    جداً سهل هالفصل بس يبيله تكرار و أغلب الأسئله راح تكون على positions مثلاً العضو الفلاني شنو بالنسبة إلى العضو فوقه تحته وراه .. إلى آخره، يعني تحددون موقعهم
    ويسأل عن تقسيمه الabdomen مثلاً الكلية تقع بأي جزء ؟ وهكذا يعني محتاج فهم و اذا فهمتوا بتحفظون

    الفصل الثاني

    راح يبدأ يتكلم عن الأنسجة في الجسم و كل نسيج من شنو يتكوّن و شنو وظيفته : / muscular epithelium/ connective/ neural
    الطلائي/ الضام / العصبي / العضلي
    و شنو أنواعهم و مواقعهم في الجسم و شنو الخلايا اللي تكوّنهم
    و بالنهاية راح يتكلم عن tissue repair process and inflammation ( الالتهابات و عملية التئام الجروح )

    بالامتحانات غالباً يسأل عن :
    - أنواع الفايبرز اللي تكون الTissue الفلاني
    - النسيج الفلاني وين موقعه
    - ودايماً يسألون عن transitional epithelium ليش يكون متواجد في urinary bladder
    - وpseudostratified epithelium شلون شكله ؟
    و هكذا ..

    الفصل يركّز وايد على epithelium and connective tissue و يتكلم بشكل مبسط عن الباجين لأن راح تاخذونهم بعدين بجابترات بروح

    سوو مقارنة بينهم و مخططات راح تساعدكم لأن أحياناً لمن تركزون حيل بالتفاصيل راح تنسون التقسيمة الرئيسيه أو إن هالنسيج تحت أي برانش فركزوا و كرروا للمرة الثانية أقولها


    الفصل الثالث : cell ( الخلية )

    راح تدرسون هالجابتر من كتاب ثاني غير الكتاب مالكم + نوت إضافية من الدكتور

    ملاحظة : هالفصل لمن تاخذونه بتكونون بلشتو كويزات بالجابترز اللي فاتت فغالباً يصير في تهاون و يتراكم ، نصيحة ابدوا فيه أول بأول راح تاخذون اربع الى خمس محاضرات عشان تخلصونه فدرسوا كلمحاضره بيومها عشان لا تتوهقون لأنه سهل لكنه دسم حيل و فيه معلومات وايد !!

    تقريباً كلها معلومات أنتو عارفينها وخذيتوها من قبل لكن الفرق إنها بالإنجليزي :
    Cell organelles عضيّات الخلية بالتفصيل
    Modes of transportations طرق النقل في الخلايا
    Plasma membrane components مكونات الغشاء البلازمي
    Cell division انقسام الخلية
    والجزء الاخير مو كله معاكم عنgenetics و تكوين DNA و البروتين في الجسم

    الجابتر طويل بس حلو ، بالامتحانات مافي اسئله لف و دوران كله مباشر يمكن بس بجزء ال transport يسألكم عن خطوة معينة او شيء جذي بيعرف منو اللي فاهم اما الباجي كله مباشر و وايد يحبون يسألون عن الأمراض اللي موجودة بالبوكسات الزرق وايد ركزوا عليها

    هذي كويزات وايد مفيده و كانوا اييبولنا منها قبل

    [Quiz 1 ] |[ Quiz 2 ] | [ Quiz 3]


    الفصل الرابع : human development ) embryology )

    تطوّر الأجنّة :
    راح تدرسون هالجابتر من كتاب ثاني بعد
    هالجابتر يتكلم عن كيفية تكوّن الجنين و تطوّره بكل أسبوع
    إلى أن ينولد ، و نوت اضافيه عن الكلوننق ( الاستنساخ )
    وايد دقيق الجابتر و يبيله مجابل و فهم و حفظ خصوصاً الترتيب الزمني للتكون ، ركزوا مع الدكتور و حاولوا تشوفون فيديوات باليوتيوب ، مراح تلاقون فيديو يشرح كل شي تبونه سواء بهالجابتر او الباجين ،لكن بحثوا عن النقطه اللي انتو مو فاهمينها و بتلاقون ، واذا ع اللغه حاولوا تقرون بالعربي بعدين اقروه بالانجليزي ممكن هالطريقة تساعد بعد ، راح احطلكم لينك فيديوات بقناة باليوتيوب ساعدتني اتمنى انهاتساعدكم ، و في سلايدات لنفس الجابتر ، نفس اللي بالكتاب لكن مرتبة اكثر منه يمكن يساعدكم ..

    القناة اللي فادتني بالفهم :

    youtube.com/user/AnimatedEmbryology

    فيديوات نزلتهم لنا الدكتورة و ساعدتنا :

    Meiosis and Mitosis:



    Oogenesis:


    Implantation :



    رابط اسئله و كويزات للجابتر حلوة للتدريب و تعرفكم على نوعية الاسئله اللي ممكن يحطونها لكم
    http://wps.pearsoned.com/bc_marieb_hap_9_oa/218/55856/14299341.cw/index.html


    الفصل الخامس : الجلد ( skin )

    أسهل چابتر .. كلمة و رد غطاها و شوية أمراض متعلقه بالجلد

    راح تردون تدرسونه من الكتاب الرئيسي ، وااايد واضح و سهل راح تاخذون طبقات الجلد و من شنو يتكون و الغدد اللي فيه .. الخ + راح يعطيكم الدكتور نوت صغير و بسيط اضافي عن بعض الامراض المتعلقهبالجلد ، الجابتر وايد سهل و مضمون بس مشكلته راح تاخذونه حده حده قبل الميدتيرم و بتكونون تعبانين من الكويزات لكن شدوا حيلكم و حاولوا تخلصونه وتعيدون عليه قبل الامتحان ، راح ارسل ملخص للجابتران شاء الله يساعدكم


    الفصل السادس: الجهاز العضلي ( muscular system)

    فصل خفيف و حلو ، و مو كله كامل داش وياكم بس لي النص ، راح تاخذون انواع العضلات..كيفية الانقباض و الانبساط و تحريك العضله.. الاصل و الادخال .. حركات العضلات .. بعض الامراض اللي ممكنتصيب العضلات .. نفس اللي خذيتوه بالثانوية فهموا جزء الفسيولوجي عدل لان راح يسألكم بالخطوات او يحطلكم مثلاً اي وحدة من هالاجابات صح و تختارون .. او يقولكم رتبوا الخطوات .. ملخص الجابتر تحت


    الفصل السابع و الأخير ..

    الجهاز العصبي ( nervous system )

    راح تدرسونه من الكتاب + نوت فسيولوجي اضافيه من الدكتور
    الجابتر راح ينقسم جزئين اناتومي ( راح تدرسون تشريح المخ و الاعصاب ) و من شنو يتكون و شنو وظيفته كلمة و رد غطاها
    افضل طريقة شوفوا فيديوات لهم عشان تثبت خصوصاً lobes و الفرق بينهم
    و جزء فسيولوجي ( صراحة وايد ممتع و حلوو راح تستمتعون فيه سبحان الله شلون باقل من ثانيه كل هالتغييرات تصير راح تاخذون ) النوت لطيفين و تقريباً يعيد و يزيد بنفس افكار الكتاب ففهموا الافكارالرئيسيه ملوتهم و امشوا عليهم مرة ثانية

    واهم شي في جداول للاعصاب ١٢ عصب لازم تحفظونهم صم ما يخلى الامتحان منهم اقل شي خمس اسئله و كل سنة اييبونهم ..

    بالنسبة للابات :
    ركزوا باللابات أهم شي تعرفون كل نسيج شنو العلامة المميزة فيه طبعاً بعض المرات راح تحسون كلهم نفس الشي لكن حاولوا تضمنون أكبر قدر ممكن
    كل حرف .. كل كلمة .. انتو مطالبين ان تفهمونها
    و توقعوا ان تشوفونها بالامتحان
    للاسف هذا نظامهم باللاب ، فكل شي ركزوا عليه و كل كلمة فهموها ..
    صح وايد راح تتكرر عليكم اماكن الانسجة
    لكن احسن طريقة كتبوا مثلاً كل مكان من شنو يتكون :
    مثلاً trachea : stratified squamous epithelium/ pseudo stratified
    وجذي سوو لسته عقب ما تخلصون عشان تلمون كل المعلومات

    لان بالامتحان راح يعطونكم الاسئله و معاها ورقه فيها صور سلايدات تحت المايكروسكوب مرقمين و تسألكم شنو النسيج اللي موجود بالمكان الفلاني ، و شنو النسيج اللي صفاته جذي ، يعني مراح يكون مباشرعرفتوا ، و درس الميكروسكوب الاول دايماً تسأل عن تحضير السلايدات و الصبغة الفلانية ليش نستخدمها او تعطيكم سيناريو و تقول شنو الخطوة اللي نساها او شنو الشي الغلط اللي سواه و اهو يشتغل ..

    العملي يدرسونه دكتورتين :

    Dr.Azma
    اللي خذوا عندها وايد استفادوا منها شرحها قوي و جبار و تأسس عدل بالهستو و اهي اللي تحط الاسئله لانها المسؤولة على الجزء العملي لكن شديدة و ما تحب الاسئله التافهه او الطالب المهمل و احياناً تكون عصبية فلا تسألونها الا بشي صعب و جايد عشان لا تعصب عليكم:grin:

    Dr.Shaista
    الدكتورة واااااايد حبوبة و عسل و تحب كل الطلبة و صدرها رحب للأسئله عادي تقعدون بالمكتب عندها ساعه و ساعتين تشرح لكم و تعيد و تزيد ، شرحها أقل جودة من Azma
    تشرح لكم اللي موجود و اللي عليكم بس Azma تأسيس
    أنا خذيت عندها الكورس الأول والثاني صراحة مافرق معاي شي
    اللي ماخذين عندها سألوا الطلبة الثانين عن ازما شنو قالت و شنو ركزت عليه عشان تلمون المادة عدل

    [​IMG]
    [ Book: Biology ]

    [​IMG]
    [ Labs: Biology ]

    [​IMG]
    [ Test Bank Q: Biology ]




    Chemistry 1
    واايد وااايد وااايد حلوة و سهلة ..
    تقريباً منهج الثانوية كله مختصرينه بهالمادة
    على أيامنا كانت general كاملة و بس جابتر organic
    لكن الحين صارت General و Organic كاملين و صارت chemistry 2 بس بايوكمستري ( كيميا حيوية )

    تقسيمة الدرجات :
    ( 27% quizzes ( 9 per 1 quiz
    3% homework
    25% midterm
    45% final

    المادة تتكلم عن الكيميا العامة ( الحسابات نفس الثانوية افوجادرو و ربعه ) و قوانين الغازات و حسابات المعادلات و تحويلات + و شوية جزء عن الاشعه جاما و بيتا و الفا + جزء الكيميا العضوية كامل مع شوية اضافه جديدة عليكم ماخذيتوها بالثانوية

    المادة محتاجة تدريب وايد على المسائل لأن فيها أفكار
    و لازم فهم كامل للمادة ولازم تعرفون طريقة المعادلات و انواع التفاعلات بالعضوية ( تمرنوا على الأمثله الخضرا اللي بالكتاب )

    فيه تست بانك لازم ماتدخلون أي كويز و أي امتحان إلا وأنتو حالينه كله بايدكم لأن كل الاسئله اييبون افكارها كلها منه اذا ما شفتوه ولا تدربتوا عليه مراح تعرفون تحلون !!!!

    بالنسبة للواجب : اهو بعد كل جابتر يطلب الدكتور منكم تحلون اسئله معينة من تقويم الكتاب و تسلمونه الاجابات نصيحة لا تنقلون من اي احد حلوه بايدكم مو عن شي عشانكم انتو تستفيدون و تكونون حزة الامتحان مارين عليهم

    الكويزات راح يسوون اربعه و ياخذون اعلى ٣

    [​IMG]
    [ Test Bank Q: Chemistry ]


    Physics for MS :
    تقريباً نفس فيزيا الثانوية مافي أي اختلاف سوى إنها بالانجليزي
    المادة مو ذاكره تقسيمة الدرجات شلون لكن فيها assignments تنزل أون لاين تحلونها و لها موعد تسليم معينه و تنشال بعدين من البلاك بورد
    و في كويزات في دكاترة عادي يخلونها اون لاين و في دكاترة لا يسوونهت بالكلاس
    و ميد و فاينل !!
    احنا كنا نروح مجموعه عن مدرس كان ممتاز عارف تركات الدكاترة و المنهج كله كان يدرسنا و يلخص لنا الجباتر والاشياء المهمة لان ماكان عندنا وقت لها ، و يحل معانا التست بانك لان افكار الامتحانات كلها منه ..


    Medical terminology:
    هي مادة حق المصطلحات الطبيّة تقريباً كلها كلمات و ترجمتها للغه الطبية مثل ما يقولون
    تدرسون prefixes و suffixes
    اذا شفتوهم تعرفون معنى الكلمة مثلاً
    Biology =
    bio = life , logy=science
    Biology = study of life

    المادة سهلة بس يبيلها حفظ بحت بحت لا اكثر
    درسوها اول بأول عشان لا تتراكم عليكم و في بعض الأشياء تتكرر عليكم بالبايو فراح تثبت ان شاء الله
    و فيها كوزين و برزنتيشن


    ( Medical education ( dentistry :
    مادة مثل مقدمة عن الصحة العامة
    راح تدرسون جزء نظري عن أساسيات البحث و شلون تكتبون المراجع بعدة طرق و تعيدون صياغه الارتكلز و راح يطلب منكم الدكتور تختارون ارتكل و تعيدون صياغته و تقدمونه كبرزنتيشن وعليه ٢٠٪ فاختاروا القروب عدل عشان لا تتوهقون ، و راح تكملون بالجزء النظري عن كيفية التعامل مع البيشنت و شنو طبرالاسنان و شنو تقدر تشتغل بعدين و شويه جزء عن ethics
    المادة مافيها ميدتيرم لكن فيها فاينل للجزء النظري و فيها برزنتيشن ثاني راح تسوون mind map عن موضوع يختاره الدكتور و انتو تطلعونه من ارتكل و تلخصونه بمخطط حسب مواصفات الدكتور و تقدمونه كبرزنتيشن ثاني ، وفي آخر السنة راح يطلب منكم portfolio تسوونه هارد كوبي لازم تكتبون كل اسبوع من بداية الكورس your reflection and self evaluation حق كل محاضرة كل طالب لازم يسويه فسجلوا تواريخ المحاضرات من أول اسبوع عشان لا تتوهقون ، و بعيداً عن المثالية محد يسويه الا قبل التسليم ما نقص على بعض و اغلبه تأليف :tearsofjoy: يعني قبل التسليم باسبوع او اسبوعين فتحوا لكجر لكجر و اقروهم و كتبوا شنو استفدتوا و شنو تقييمكم حق نفسكم بالفورم اللي اهو حاطها ، و غالباً ما يدققون على البورتفليو كثر ما يشوفون شغلكم بالبرزنتيشنات

    أتمنى غطيت مواد الفصل الأول لو في أي سؤال إن شاء الله نفيدكم



    بالتوفيق :bouquet:
     
  2. AbuRamyah

    AbuRamyah Trainee

    Joined:
    ‏5/8/18
    Messages:
    1
    يعطيك العافيه و جزاك الله خير على هالمعلومات , انا ان شاء الله هذه اول سنة تحضيري و باذن الله باخذ على نصايحك و معلوماتك
     

Share This Page