مقابلة لطلبة الطب حول قبولهم في المركز

Discussion in 'اسـتـراحــة الـمـركـز' started by Ayejay, ‏13/1/18.

  1. Ayejay

    Ayejay

    Senior Registrar
    Joined:
    ‏27/6/16
    Messages:
    10
    السلام عليكم ورحمة الله وبركاته


    هذي المقابلة حق طلبة كلية الطب في جامعة الكويت وتعتبر كتشجيع حق خريجينا من طلبة الثانوي وعشان يعرفون كليتنا العريقة عن قرب ❤️


    ألف مبروووك حق كل اللي حققوا أحلامهم وانقبلوا سواء بكلية الطب- طب أسنان - صيدلة وصاروا جزء من هذي العائلة. نوّرتونا!




    كلمة بالبداية حق طلبة الثانوي، أنتو قدها بإذن الله وما بقا كثر اللي راح وبتتخرجون إن شاءالله بأعلى النسب يا رب وتدخلون المكان اللي طول عمركم تتمنونه.. وهم بتتعبون وتدرسون وتدرسون وتدرسون.. أتغشمر أكيد هالمرة بيكون التعب أحلى وعلى قلوبكم مثل العسل وعسى الله يسهل عليكم ويوفقكم ياااارب


    بسم الله، ونبلش بمقابلتنا


    - طالب بأي دفعة؟ وبأي تخصص (طب- أسنان- صيدلة)؟

    - شنو كانت طموحاتك لما كنت طالب بالثانوي؟

    - شنو الصعوبات اللي مريت فيها أيام الثانوي وبالقدرات؟؟ وشلون كان وضعك مع التنافس على المعدلات المكافئة العالية؟

    - شلون قدرت تواجه هالصعوبات وتعديها؟

    - شمعنى اخترت الطب من بين كل التخصصات؟

    - ليش اخترت تدرس الطب -بالكويت- ومو بأي مكان ثاني؟

    - أوصف لنا شعورك بعد القبول

    - شلون كنت متوقع الكلية قبل لا تدخلها؟

    - شنو انطباعك عن الكلية الحين؟

    - كلمة أو رسالة توجهها حق طلبة الثانوي اللي ناوين ينضمون لنا

    المايك لكم الحين
     
  2. Ghadeer AlDahham

    Ghadeer AlDahham Trainee

    Joined:
    ‏13/6/18
    Messages:
    2
    طالب بأي دفعة؟ وبأي تخصص (طب- أسنان- صيدلة)؟
    صيدلة 2016

    شنو كانت طموحاتك لما كنت طالب بالثانوي؟
    كان ودي افتحلي مخبز بفرنسا - طموحي ادش تخصص يجمع المجال الطبي والرياضيات

    شنو الصعوبات اللي مريت فيها أيام الثانوي وبالقدرات؟؟ وشلون كان وضعك مع التنافس على المعدلات المكافئة العالية؟
    احد الصعوبات كان وقت امتحان القدرات الي يصادف امتحانات الفترة .
    ان ادرس واجتهد بامتحان القدرات وانصدم بالدرجة الي مالها علاقه باللي حليته :) .
    الضغط الي يسوونه العالم لطلبة الثنويه العامه على انها سنه مصيريه (ماكان له داعي ) .
    ..ماكان يشكل هالتنافس اي مشكلة بالنسبة لي لأن كنت حاطة ببالي ان كل واحد بياخذ رزقة وبيدخل تخصصه الي الله كاتبه له لو شنو يسوي .. الواحد يبذل مجهود ويتوكل على الله.

    شلون قدرت تواجه هالصعوبات وتعديها؟
    حاولت مره ورا الثانية ..جربت كذا طريقة للدراسة ورحت كذا معهد لين نجحت

    ليش اخترت تدرس الطب -بالكويت- ومو بأي مكان ثاني؟
    درست صيدلة بالكويت لان جامعة الكويت تقبلني .. بلان بي كانت الدراسة ببريطانيا الجميلة

    أوصف لنا شعورك بعد القبول
    شعور حلو ان انا قدرت ادخل التخصص الي ابيه وبالمكان الي ابيه والله يقدرني على اني اكمل

    شلون كنت متوقع الكلية قبل لا تدخلها؟
    كنت متوقعة ان فيها ملاعب ومضمار ركض ومكتبة كبييييرة نفس الافلام بس اصلن عادي

    شنو انطباعك عن الكلية الحين؟
    عرفت شعور الناس لمن قالو جو الجامعة غير وشلون تكون حياة الطالب الجامعي يومه اغلبة دراسة وربع الدراسه غير

    كلمة أو رسالة توجهها حق طلبة الثانوي اللي ناوين ينضمون لنا
    حياكم الله .. وموفقين
     
  3. Nourah

    Nourah ku-med.com

    - طالب بأي دفعة؟ وبأي تخصص (طب- أسنان- صيدلة)؟
    * دفعة ٢٠١٦
    *طب بشري


    - شنو كانت طموحاتك لما كنت طالب بالثانوي؟
    *صراحة لماا كنت بعاشر كنت افكر بهندسة بس بعد ماشفت الفيزيا قلت ماتوقع راح اقدم على مكان ماحب شي اساسي فيه، ووقتها كنت حييل اتاابع دكاترة اسناان واحب ازوورهم واقرا مقالات ومواضيع واشوف فيديوات عن الاسنان فا قلت خلاص ابي ادخل طب اسنان بس كان عندي شعور قوي حيل ان راح انقبل بشري
    * اول ماطلع قبولي بشري وانا كنت حاسه ١٠٠٪؜ اني بنقبل بشري قلت ماعليه ان شاء الله خيره ، بس بعد ماارحت لاول هوسبتل فيزت مع الكليه حمدت ربي مليون الف مره اني انقبلت بشري وحبيت المكاان حييل والحين اقول الحمدلله اني مانقبلت اسناان لان مجال الطب البشري حييل جاازلي ويشدني


    - شنو الصعوبات اللي مريت فيها أيام الثانوي وبالقدرات؟؟ وشلون كان وضعك مع التنافس على المعدلات المكافئة العالية؟
    * صراحة من ناحية الدراسة بالثنوي ما واجهت ذيك الصعوبه بس المشكله فيني اني كنت ادرس حده قده حيل وانضغط بس الحمدلله كل الامور كانت تمام
    * اما على القدرات فا كنت ماخذته لعبه للاسف ولا شديت حيلي وكنت اقول بعدين ادرس بعدين لين المحاوله القبل الاخيره اللي حسيت لا ترا الموضوع جد واذا مااستوعبتي اللي يصير ماراح تنقبلين بالمكان اللي تبينه فا بديت ادرس له والحمدلله قدرت اخذ معدل يخليني ارتاح والمحاوله الاخيره رفعت من درجاتي شوي وصرت مرتاحه ان في امل انقبل باحد تخصصات مركز العلوم الطبية


    - شلون قدرت تواجه هالصعوبات وتعديها؟
    * اذا على صعوبات الدراسة بالثنوي انا كنت احاول افهم كل شي بالحصص وحتى لما اخذ دروس خصوصيه كنت اعتمد على فهم كل المبادئ الل بالكتاب واكون ملمه فيهم ومجرد ماادرس ابدي اضيف لنفسي المعلومات الدقيقه اللي تضمن لي باذن الله اني اخذ الدرجات الكامله

    - شمعنى اخترت الطب من بين كل التخصصات؟
    * مااتوقع في مجال كثر الطب يشدني ويخليني احب اعرف وادرس كثره
    * ومرات لما اقعد مع نفسي وافكر ليش اخترته اتوصل الى ان الله سبحان وتعالى سهل لي الطريج واختارني والحمدلله راضيه بكل شي يقسمه لي ربي

    - ليش اخترت تدرس الطب -بالكويت- ومو بأي مكان ثاني؟
    * بهالموضوع ماكان لي خيار امي ماكانت راضيه ادرس برا

    - أوصف لنا شعورك بعد القبول
    * صراحة اول ماطلع قبولي مااكنت مستانسة بس كنت حيييل حييب مرتااحة وراضيه بس امي كانت حييل مستانسه لانها كانت تبيني انقبل بشري والحمدلله انقبلت

    - شلون كنت متوقع الكلية قبل لا تدخلها؟
    صراحة توقعت ان الكليه يعني مو مثل كليات برا انها قويه وجذي وتوقعت بتكون عادي وامشي حالي
    * بس صراحة انصدمت من ان الكليه حدها قويه والمناهج مرتبه بشكل مريح للدارس
    * وبالنسبه للاشخاص اللي بالكليه قبل لاانقبل كنت اتوقع محد بيساعدني وكل واحد يصير نحيس ويخاف على درجاته ولا يساعد بس اللهم لك الحمد الكليه كلها اخوان وعلى قلب واحد بالمساعده الدراسيه وكل دفعه تساعد الدفعه اللي اصغر منها ويشوفون شنو يحتاجون والطالب الشاطر يحاول يفهم الباقي ويساعدهم فا الحمدلله الجو بالكليه جدا مريح

    - شنو انطباعك عن الكلية الحين؟
    اقوى كلية من كليات جامعة الكويت واحمد الله الف مره اني انقبلت فيها

    - كلمة أو رسالة توجهها حق طلبة الثانوي اللي ناوين ينضمون لنا
    اول شي الله يوفقكم ويسهل عليكم الطريج اللي فيه راحه لكم شدوا حيلكم وادرسوا عدل لاتتضايقون لو نزلت درجاتكم لاتتحبطون استمروا بالمحاوله واذا هالمكاان فيه خير لكم الله رااح يسهل عليكم طريجه وراح تنقبلون فيه بادن الله وانتوا قدها باذن الله واحنا فخورين بأمثالكم ومستعدين نساعدكم باس شي تبونه
     
    AmarAlshalani likes this.

Share This Page