مقابلة | بعد التخرج من كلية الطب بجامعة الكويت..ما رأيك بالدراسة فيها ؟

Discussion in 'اسـتـراحــة الـمـركـز' started by purple heart, ‏7/7/16.

  1. purple heart

    purple heart

    Staff Member Consultant
    Joined:
    ‏27/7/13
    Messages:
    95
    بسم الله الرحمن الرحيم
    السلام عليكم ورحمة الله وبركاته


    مبروووووك لكل الدكاترة المتخرجين من كلية الطب !!
    ألف ألف مبروووك ومنها للأعلى يا رب
    عساها بداية خير لمشوار ناجح ونشوفكم أكبر الاختصاصيين والاستشاريين


    You Made It !!
    بما أن سوينا موضوع للتخرج الأول..يا الدور اللي نسوي موضوع للتخرج الثاني ونشوف رأيكم بالسنوات الاكلينيكية وعموما بكل مشواركم بكلية الطب وخصوصا جامعة الكويت

    أتمنى تجاوبون بكل صراحة بعد هالمشوار الطويل..عشان يستفيدون الطلبة منها و تبقى ذكرى ان شاء الله

    راح اطرح مجموعة أسئلة مثل مقابلة بسيطة تبينون فيها رأيكم..وتقدرون تكتبون بدون الالتزام فيهم على راحتكم

    كررنا جم سؤال من الموضوع السابق مع أسئلة يديدة مخصوصة لكم..علشان نشوف وجهة النظر تغيرت او لا

    حياكم الله يا دكاترتنا


    وبسم الله نبدأ:
    General Questions
    1- ما هو شعورك بعد التخرج ؟

    2- من أي دفعة تخرجت ؟ او بأي سنة دراسية؟

    3- بشكل عام..ما رأيك بالفترة التي قضيتها خلال دراستك للطب بجامعة الكويت؟

    4- ما هي الفترة المفضلة لديك..سنوات العلوم الأساسية ام السنوات الاكلينيكية؟ ولماذا ؟

    5- لو كان لك ان تضع اقتراحات لتغيير المنهج الدراسي للافضل..فماذا سوف تقترح وتغير؟

    6- ما هي ايجابيات الدراسة في الكويت ؟ وما هي السلبيات ؟


    7- هل تؤيد قرار تحوبل دراسة الطب بالكويت الى 6 سنوات بدلا من 7 ؟!



    About Clinical years


    8-ما رأيك بالفترة التي قضيتها خلال دراستك للسنوات الاكلينيكية ؟

    9- ما رأيك بنظام الدراسة وتوزيع التخصصات على هذه الثلاث سنوات ؟

    10- رأيك بال Pbls ? MSDs ? Exams ?

    11- ما هي السنة المفضلة لديك؟ ولماذا ؟

    12- ما رأيك بسنة سابعة ؟!

    13- ما هو أفضل روتيشن دراسيا او عمليا؟ ولماذا ؟

    14- أسهل روتيشن واجهته؟ أصعب روتيشن ؟ وما هو المفضل لديك ؟مع ذكر السبب ؟

    15- لو تستطيع العودة الى بداية سنة خامسة واصلاح اخطائك اثناء الدراسة..ما هي اخطائك؟ كيف ستصلحها ؟

    16- نصيحتك لكل الطلبة..سواء المقبلين على هذه السنوات الاكلينيكية..او الذين مازالوا فيها ؟

    17- برأيك..هل تظن أن دراسة هذه السنوات كافية وجعلتك مستعد تماما لتصبح طبيب عام او تريني وتعالج المرضى ؟

    18- هل هنالك وقت كافي خلال هذه الثلاث سنوات بغض النظر عن ما قبلها لعمل البحوث او تنظيم المؤتمرات او المشاركة بالأنشطة التي تساهم في تقوية الC.V ؟


    Back to Basic Sciences

    19 - ما مدى استفادتك من الأربع سنوات بالعلوم الاساسية للسنوات الاكلينيكية ؟

    20- لو كانت لديك الفرصة للعودة الى دراسة العلوم الأساسية قبل ان تدخل الاكلينيكية ماذا سوف تغير من اخطائك ؟ كيف ستقوي نفسك ؟


    أسئلة ختامية

    21- ما هو التخصص الذي اخترته بعد التخرج ؟ ولماذا ؟

    22 - هل تفكر باكمال دراستك بالكويت ام الخارج ؟ السبب ؟

    23- ما رأيك بقرارك بدخول الطب؟ هل ندمت عليه؟

    24 - هل من شيء تريد اضافته ؟


    كلمة ختامية تختم فيها المقابلة ومشوارك بالكلية



    بانتظار اجاباتكم بكل شوق
     
    Last edited: ‏8/10/16
  2. purple heart

    purple heart

    Staff Member Consultant
    Joined:
    ‏27/7/13
    Messages:
    95
    :thumbsup:شكلي راح أكون أول من يجاوب :$
    General Questions


    1- ما هو شعورك بعد التخرج ؟
    أول ما طلعت النتيجة..الصراحة ما صدقت عيوني..ظليت فترة على ما استوعبت..بجيت من الفرحة مو مصدقة

    فرحة كبيييرة الحمدلله ان بعد هالتعب لقينا هالنتيجة

    مو مصدقة ان خلصت 7 سنين.. مو مصدقة اني حققت الحلم الحمدلله

    2- من أي دفعة تخرجت ؟ او بأي سنة دراسية؟

    دفعة 2009 - سنة 2016

    3- بشكل عام..ما رأيك بالفترة التي قضيتها خلال دراستك للطب بجامعة الكويت؟
    كانت فترة حلوة بشكل عام..فيها صعوبات اكيد لكن مقدورعليها..وايد خرعونا بالبداية وماراح يصير عندكم حياة..بالعكس الحمدلله قدرنا نوازن بين حياتنا الشخصية والدراسية..فيه بعض التضحيات أكيد..لكن الحمدلله ربي وفقنا وحلاة الشي بصعوبته
    ما ندمت على قراري
    كانت تجربة ناجحة

    4- ما هي الفترة المفضلة لديك..سنوات العلوم الأساسية ام السنوات الاكلينيكية؟ ولماذا ؟
    السنوات الاكلينيكية طبعا..كنت انتظرهذي اللحظة اني اتعامل مع المرضى واطبق المعلومات اللي درستها..الجانب العملي أونس بوايد حتى حياة المستشفى..حتى الحمدلله درجاتي صارت أحسن

    5- لو كان لك ان تضع اقتراحات لتغيير المنهج الدراسي للافضل..فماذا سوف تقترح وتغير؟
    المنهج:
    - أحذف الأشياء المتكررة..وأقلص سنين الدراسة الى 6 سنوات
    - أضيف تخصصات اكثر بالسنوات الاكلينيكية مثل طب الطوارئ والمناعة واخلي كل التخصصات فيها جانب عملي..مثلا الthoracic and neurosurgery
    - أخلي الobjectives واضحة أكثر خصوصا للامتحانات وطريقتها
    - أحط لكل تخصص كتاب يكون المرجع الأساسي
    - أقوي الجانب العلاجي بالتدريس لكل الأمراض لأن احس كنا ضعاف فيه شوي
    - أزيد فترة الدراسة للفاينل..يعطون اجازة اطول وجداول امتحانات أفضل فيها مراعاة للطلبة وانصاف لهم

    6- ما هي ايجابيات الدراسة في الكويت ؟ وما هي السلبيات ؟

    الايجابيات:

    - اني بديرتي وبين أهلي وناسي هذي ايجابية كبيييرة انهم معاي ويساندوني..أخذ شهادة الMD ..ويكون عندي طاقة بعدين أتخصص برا أكمل دراستي لو أبي ببرنامج قوي
    - التدريس قوي الحمدلله وخصوصا انك تدرس بمستشفيات ديرتك وتتعامل مع أهل ديرتك فتكون على علم أكثر بشنو أكثر الأمراض المنتشرة وشلون تتعامل معاهم
    - كنا محظوظين ان عندنا أغلبية الدكاترة قدوة بالعلم والأخلاق والتعامل مع المرضى..كانوا مشتطين انهم يدرسونا ويعلموننا ويساعدونا بكل اللي يقدرون عليه كانت فرصة حيل حلوة الحمدلله

    السلبيات:
    - الادارة شديدة على اشياء ساعات مالها داعي..الواحد كثر ما يقدر يتفادى ان يطيح باي مشكلة ادارية افضل له
    - المنهج يبيله تضبيط أكثر من الهيئة التدريسية ويكون التعاون فيما بينهم أكبر..ساعات احس حلقات الوصل بينهم ناقصة
    - الامتحانات صعبة سواء بري كلينيكال او كلينيكال مقارنة بجامعات برا
    - سلم الدرجات غير عادل..وفي دكاترة للأسف ما ينصفون الطالب مهما كان تقديمه..مما يؤدي الى تخرجنا بنسب نازلة مع ان مستوانا عالي..فشوي صعب علينا ننافس طلبة الطب بالعالم كله على مقاعد البورد المعروفة القوية
    - مختبرات الابحاث بالكويت مو بذاك التطور وحتى السبل انك تسوي بحث حتى لو على المجتمع فيه تأخير وطوالة مما يحبط الطلبة او يأخرهم


    7- هل تؤيد قرار تحوبل دراسة الطب بالكويت الى 6 سنوات بدلا من 7 ؟!
    طبعا نعم

    About Clinical years


    8-ما رأيك بالفترة التي قضيتها خلال دراستك للسنوات الاكلينيكية ؟
    حيل حلوة ومفيدة مع انها دسمة شوي وثقيلة..لكن ممتعة

    9- ما رأيك بنظام الدراسة وتوزيع التخصصات على هذه الثلاث سنوات ؟
    - حبيت ان بسنة سابعة بس نمتحن مديسن وسيرجري وسايك بدون ما نعيد القايني والبيدز
    - حلو ان ندرس الجنرال مديسن والجنرال سيرجري مرتين بسنة خامسة وسابعة
    - الsub- speciality توزيعهم مو مرتب أبد على هالثلاث سنوات ولا كانت واضحة من ضمن الobjectives..يعني كل سنة تقريبا الطالب يدخل عمياني بدون ما يعرف فكرة هالثلاث عموما

    10- رأيك بال Pbls ? MSDs ? Exams ?
    Exams:
    - صعبة بس مقدورعليها ان عرفت بالضبط شنو راح تمتحن وبشنو وخصوصا لما تكلم الطلبة اللي سبق وامتحنوا ويعلمونك الطريقة

    MSDs:
    - فكرتهم حلوة بس هم شوي يبيلهم تضبيط..وتفيد وايد حق الامتحانات..يكون يوم راحة حلو تشوف فيه ربعك وتغير من المستشفى

    PBls :
    - بالكلينيكال حييييل حييييل مفيد ووايد نستفيد منه..خصوصا ان ايك دكتور متخصص بمجال الحالة ويسأل ويناقش
    وطريقة بعد بي بي ال السيرجري أفضل وحدة !
    - وطبعا مافيه ابداع الالتزام بالوقت نفس البري كلينيكال ولازم بالثواني ينحسب عليك ويروح التوقيع !
    ابدا لا

    طريقة الروتيشن حلوة انك تداوم تحت دكتور او يكون عندك سيشن معاه داخل المستشفى وايد مفيدة
    11- ما هي السنة المفضلة لديك؟ ولماذا ؟

    سؤال صعب :$
    يمكن عموما كسنة كاملة كانت سنة رابعة..
    وبالسنوات الاكلينيكية جم روتيشن اللي حبيتهم حيل..مثلا خامسة سيرجري..البيدز والمديسن مال سادسة..وبسابعة السايك والمديسن

    12- ما رأيك بسنة سابعة ؟!
    اخيه..
    فعليا أخف سنة كدوام ! لكن كنفسيا أيباااه تشلخنا عدل
    خصوصا توزيع الدرجات فيها جدا فاشل ! اتمنى من كل قلبي يغيرونه..لكنها سنة حلوة في ان حسينا الدكاترة وايد يعاملونا بطريقة غير ان شبه دكاترة وان احنا صرنا واثقين بنفسنا اكثر كمعلومات
    وروتيشن السايك كان فعلا ممتع
    والبري انترن فكرته حلوة ان صرنا نفهم طريقة الدوام لو كنا تريني..بس يا ريت يقللونه

    13- ما هو أفضل روتيشن دراسيا او عمليا؟ ولماذا ؟
    دراسيا وعمليا: البيدز بكل جدارة
    روتيشن مرتب بالدوام حيل..اهدافه جدا واضحة سواء للدوام او الامتحان
    تعلمنا منه وايد مو بس للبيدز بس حتى المديسن ! وبشكل عام لدراستنا

    14- أسهل روتيشن واجهته؟ أصعب روتيشن ؟ وما هو المفضل لديك ؟مع ذكر السبب ؟
    أسهل واحد كان روتيشن السيرجي بسادسة حيل خفيف ولطيف
    أصعب واحد كان القايني من ثقله
    المفضل كان الأورثو من خامسة

    15- لو تستطيع العودة الى بداية سنة خامسة واصلاح اخطائك اثناء الدراسة..ما هي اخطائك؟ كيف ستصلحها ؟
    - راح أأسس نفسي عدل بالمديسن والسيرجري واحفظهم عدل عشان استعد لسابعة
    - يكون هدفي احصل اعلى الدرجات كثر ما اقدر بكل التخصصات
    - اسوي تلاخيص حلوة لأهم المواضيع تفيدني خلال سنين الدراسة وحتى لو تخرجت
    - اقضي وقت فراغي بالدراسة أكثر..واستعد عدل للبي بي الز في اني ابحث بالمواقع المعتمدة
    - دراستي تكون مرتبطة اكثر بموقع up to date
    - ادرس كتب usmle , MRCP واي امتحان عالمي متوازي مع دراستي للمنهج حتى لو بكمل دراستي بالبورد الكويتي
    ادرسهم side to side
    - افتح الباست اكزامز ببداية كل روتيشن عشان اعرف بشنو لازم اركز
    - ببداية كل روتيشن احط لي خطة خاصة حقه شلون راح ادرس له واقسم الجابترز على الايام واكون اكثر ترتيب بالدراسة والمراجعة

    16- نصيحتك لكل الطلبة..سواء المقبلين على هذه السنوات الاكلينيكية..او الذين مازالوا فيها ؟
    - درسوا البيسك ساينس عدل عدل..لان بالكلينيكال ماكو وقت تدرسونهم من يد ويديد..بس مراجعة سريعة
    - حافظوا على معدلاتكم انها تكون عالية وحاولوا ترفعونها كثر ما تقدرون
    - درسوا أول بأول..خصوصا للروتيشن لأن بالفاينل ماكو وقت الا للمراجعة
    - كونوا علاقة حلوة مع الدكاترة واستفيدوا من خبرتهم كثر ما تقدرون وخلوهم يعرفونكم
    - حرصوا انكم تسوون ريسيرجات واليكتفات سواء بالكويت او برا وتقوون ال CV

    17- برأيك..هل تظن أن دراسة هذه السنوات كافية وجعلتك مستعد تماما لتصبح طبيب عام او تريني وتعالج المرضى ؟
    اي الحمدلله :thumbsup:

    18- هل هنالك وقت كافي خلال هذه الثلاث سنوات بغض النظر عن ما قبلها لعمل البحوث او تنظيم المؤتمرات او المشاركة بالأنشطة التي تساهم في تقوية الC.V ؟
    اي الحمدلله..اللي يبي في وقت..خصوصا بعطلة الصيف استغلوها عدل..ونظموا لهالأمور من قبل..حتى الانشطة اللي تسويها الرابطة او القوائم اللي تفيد للسي في شاركوا فيها

    Back to Basic Sciences

    19 - ما مدى استفادتك من الأربع سنوات بالعلوم الاساسية للسنوات الاكلينيكية ؟
    كبيرة الحمدلله..بس شوي نقصنا تأهيل للاكلينيكية..كنا نضيع ببداية كل روتيشن

    20- لو كانت لديك الفرصة للعودة الى دراسة العلوم الأساسية قبل ان تدخل الاكلينيكية ماذا سوف تغير من اخطائك ؟ كيف ستقوي نفسك ؟
    ادرس لهم عدل أكثر..واحاول اربط معلومات البيسك ساينس بالكلينيكال مثل مادة الكلينيكال مديسن
    واقوي نفسي بالفارماكولوجي واحفظه عدل

    أسئلة ختامية

    21- ما هو التخصص الذي اخترته بعد التخرج ؟ ولماذا ؟

    بعد ما قررت صراحة وحيل محتارة..ربي يكتب اللي فيه الخير

    22 - هل تفكر باكمال دراستك بالكويت ام الخارج ؟ السبب ؟
    هم بعد ما قررت..الله يسهل ويكتب اللي فيه الخير

    23- ما رأيك بقرارك بدخول الطب؟ هل ندمت عليه؟
    الحمدلله..كان حلم..استخرت فيه ربي..يسره لي..الحمدلله ربي وفقنا..وتخرجنا
    جدا سعيدة بهالقرار..حبيته اكثر واكثر وجدا اشجع عليه للي يحب هالمجال
    مجال جدا راقي وانساني..تعلمنا منه وايد وتغيرت فيه شخصياتنا للاحسن الحمدلله..سنة عن سنة كنا نكبر ونتغير ونتعلم وصرنا اكثر اعتماد على نفسنا واكثر قوة وفهم وغيرها من صفات ايجابية

    24 - هل من شيء تريد اضافته ؟
    لا


    كلمة ختامية تختم فيها المقابلة ومشوارك بالكلية :sunglasses:


    الحمدلله..الحمدلله..الحمدلله

    الحمدلله اللي ربي وفقنا ويسر لنا أمورنا واختارنا لهالمجال والرسالة الانسانية..وعسى الله يقدرنا عليها..وان شاء الله بانتهاءنا لهالمشوار نبتدي مشوار يديد احلى واحلى واهوه الدوام الفعلي والتخصص
    شعور لا يوصف وتشوف الكل الحمدلله مستانس من تخرجنا صغير او كبير..قريب او بعيد
    الكل يهني ويبارك على هذا الانجاز الراقي بفضل الله

    مشواري حبيت كل اللحظات اللي فيه..الحلوة والمرة..والحمدلله اللحظات الحلوة اكبر بوايد واكثر من المرة
    الايام كانت حلوة والذكريات بكل صوب وبكل كورنر ..الحمدلله السبع سنين تمر بالجد والاجتهاد والتوكل على الله وعطلة الصيف كانت تبرد جبدنا وتعطينا طاقة عشان نكمل السنين

    سعيدة جدا الحمدلله..واشجع كل شخص فيه حب لهذه المهنة والرغبة والقدرة..سئلوا عدل وبحثوا واستخيروا وعسى ربي يكتب لكم كل الخير
    والله يوفقكم جميعا


    أختكم د. شيخة الحمدان
     
    Last edited: ‏8/10/16

Share This Page