14' سنة ثالثة صيدلة.

Discussion in 'سنة ثالثة' started by FatenElKanderi, ‏2/7/18.

  1. FatenElKanderi

    FatenElKanderi Trainee

    Joined:
    ‏23/6/18
    Messages:
    1
    بسم الله الرحمن الرحيم



    مبروك نجاحكم بسنة ثانية وإن شاءالله تكون قريداتكم مثل ماكان بخاطركم:praying: .. أتوقع وايد سمعوا عن سنة ثالثة إنها صعبة ووايد يطيحون فيها ومن هالحجي .. من الحين أقولكم : سنة ثالثة مقدووووور عليها .. إي نعم صعبة ومو شربة ماي .. بس مقدور عليها واللي يطيحون فيها قليل وغالبًا النجاح والسقوط يعتمد على شطارة الدفعة.


    ليش صعبة؟ وشلون مقدور عليها؟ .. أنا أقولكم .. الصعوبة بالضغط فقط لا غير.. من 4 مواد بثانية لي 6 مواد بثالثة، ضغط ولا مو ضغط؟ لكـــــنننننننننن ماكو أشياء معقدة كلش .. محد راح يتنّح بشي وإذا صار في إشكال بأي مادة مروا على دكاترة هالمادة وماراح يقصرون معاكم إن شاءالله .. فعليًا دكاترة هالسنة كل دكتور شرحه أقوى من الثاني .. راح يحببونكم بالصيدلة إن شاءالله:handok:.


    أول شي عشان تتسهل عليكم الدراسة وتهون عليكم كمية النوت لازم لازم لااااازم تلقون لكم طريقة دراسة تفهمكم وتحفظكم وتثبتلكم النوت .. في اللي تنفعه الدراسة الجماعية، في اللي تنفعه دراسة الريدنق (طلعت صج تدرّس:tearsofjoy:)، في اللي لازم يفهم كل شي بالمحاضرة مع الدكتور، في اللي يمشّي أموره بالتفريغ الخ الخ الخ .. لمن تلقون طريقة تنفع لكم لازم تبلشون فيها على طول .. يعني سالفة إنكم تخلون دراسة النوت بالويكند بس غلط .. تعودوا إنكم تدرسون أول بأول، كل يوم بيومه:thumbsup:.


    ثاني شي الحضور .. الله يرحملي والديكم حضروا وحاولوا كثر ماتقدرون ماتسحبون على المحاضرات لأن الشرح بشكل عام جبار جبار أتعب وأنا أقول جبااااااار .. في دكاترة نوتهم تخرع .. طويلة والسلايدات زحمة ووايد حجي بس بالمحاضرات يشرحون المهم اللي لازم تعرفونه (مبيّن إني سحبت وتحسفت؟:okay::tearsofjoy:) .. في بعد اللي يعطيكم هنت أو يبين إن هالسلايد مهم ويحبه فيشتط وأهو يشرحه بالتالي راح تثبت هالمعلومة.


    ثالث شي وهو الأهم .. التلفون:iphone:. الدكاترة حيل يتنرفزون من التلفون وعادي يطردون عشانه، ف درءًا للإحراج حطوا تلفوناتكم سايلنت طول وقت الدوام:bellcancel:.


    الحين بنسولف عن المواد .. بالكورسين راح تاخذون نفس المواد بالضبط مع اختلاف المتيريال طبعا .. وبما إنكم درستوا أساسيات الصيدلة بشكل عام بسنة ثانية، راح تبدون تاخذون التفاصيل الحين.


    Pharmacology علم الدوائيات

    هذي المادة تتكلم عن الأدوية وشلون تشتغل بالجسم (mechanism of action) وشكثر تقعد بالجسم وشنو أعراضها الجانبية (side effects) وهل عندها تعارضات (interactions) مع أدوية ثانية أو أنواع معينة من الأكل، والأهم شنو الأمراض اللي تعالجها.


    هالمادة لازم تفهمونها عدل مدل عشان تقدرون تحفظون المعلومات اللي فيها .. الفارما تعتمد على الحفظ بشكل كبير .. يعني عادي أدوية تعالج نفس المرض بس تختلف بطريقة شغلها لمن تدخل الجسم.


    العموم يتأزم من هالمادة لأنهم ما يكونون عارفين شلون يدرسونها .. وقت الحفظ بهالمادة شغلوا هرمون التأليف عندكم وألفوا قصص وسوالف على الأدوية عشان تثبت .. بس عاد سووا قصص تذكرونها مو أشياء معقدة تنسونها وتتوهقون بالامتحانات:tearsofjoy::brokenheart:.. ومثل ماقتلكم درسوا أول بأول لأن مستحيل الفارما تندرس بليلة الامتحان.


    تقسيمة الدرجات بالفارما للكورسين كالتالي:


    كويزين على كل واحد منهم 5% .. التوتال 10%

    10 ميني اسسمنتس (عبارة عن سؤالين عقب ماتخلصون كل نوتة تقريبا أو تتوزع النسبة حق كل دكتور) كل واحد عليه 1% .. التوتال 10%

    مدتيرم عليه 30%

    فاينل عليه 50%

    من تقسيمة الدرجات يتبيّن لكم أعزائي إنكم لازم تشدون حيلكم من أول محاضرة لين تسلمون ورقة امتحان الفاينل.

    ا
    متحانات هالمادة MCQs و SNQs (اختياري ومقالي).


    (الكورس الأول)

    راح تدرسون بالبداية عن أهم الطرق اللي تشتغل فيها الأدوية .. هل تدخل وتأثر على الDNA ولا بس بالcytoplasm ولا على receptor على الخلية من برا؟ .. زين اهو يحتاج جرعة عالية ولا صغيرة عشان يعطينا التأثير اللي نحتاجه؟ .. كل هالأشياء بيدرسكم إياها د. أحمد الهاشم .. هالدكتور يبيله تنتبهون وتنوتون معاه بالمحاضرة لأنه يحب يسأل أسئلة فهم.


    عقبها راح تدرسون عن الأدوية اللي تشتغل على الautonomic nervous system (sympathetic & parasympathetic) .. هالجهاز راح تدرسكم إياه د. ألطاف الرميان .. هم هالدكتورة لازم تحضرون وتنوتون معاها لأنها تييب أسئلة من كلامها ومن النوت ومن الكتب إللي تحطها لكم بالرفرنس.


    بعدهم راح تدرسون أدوية تعالج أمراض القلب والشرايين والجلطات .. راح يدرسكم د. محمد قدومي ود. بيير مورو .. د. قدومي يبيله حفظ حفظ حفظ، حفظوا اللي بالنوتة وكوبي بست بالامتحان وأموركم طيبة .. أما العميد يركز على أشياء معينة بالنوت فحضروا عشان تعرفونها.


    تالي بيعطيكم د. كمال مطر عن تأثير الجسم على الأدوية .. شلون الجسم يمتصها (absorption) ويغير شكلها الكيميائي (metabolism) وعلى أي أساس تتوزع بالجسم (distribution) وآخر شي شلون تطلع من الجسم (excretion) .. د. كمال نظامه نفس د. أحمد الهاشم، يحب يسأل أسئلة فهم فانتباهكم وتنويتكم مهمين حيل.


    آخر توبك بيكون عن التسمم .. شلون يصير وشلون نعالجه .. شنو خطورة الأدويه على فئة معينة من الناس (الحوامل – الأجنة – جنسيات معينة) وهكذا .. بتدرسكم د. بدور قبازرد وهالدكتورة حيل حيل لازم تحضرون لأن شرحها بحد ذاته يعتبر طقة أولى للنوت.


    (الكورس الثاني)

    هالكورس حسيت الفارما أحلى وأمتع من الكورس الأول .. يمكن كانت أسهل حتى.


    راح تدرسون أول شي مع د. أحمد الهاشم عن هرمونات تتصنع بنفس المكان اللي لازم تأثر عليه (autocoids) .. نظامه ماتغير عن الكورس الأول .. يحب يسأل بالفهم.


    بعده راح تدرسون عن أنواع المسكنات واللي بيدرسكم اسمه د. ويلياس ماسوجا .. هالدكتور كلش مايطلع من برا النوت .. اللي مكتوب بالنوته راح تلقونه بالامتحان.


    بعدين بتدرسون أدوية الجهاز الهضمي .. بيدرسكم د. ميثم خاجة .. اللي احبه بهالدكتور إنه يبين من شرحه اهو شكثر يحب مادته .. يشرح من أعمااااااق ضميره وأيضًا مايطلع برا النوت .. حيل يحب التفاعل بالكلاس ويشتط أكثر لمن أحد يجاوب معاه فيصير الكلاس ممتع:dancer:.


    عقب بتدرسون أدوية الجهاز العصبي .. كل دوا يأثر على المخ والأعصاب والأشياء المرتبطة فيهم (الذاكرة - الحركة) وسوء استخدام هالأدوية شيسوي وهكذا .. هالجزء بياخذ محاضرات وايد هالكورس فضروري انكم تكونون فاهمينه عدل .. بيدرسكم د. سامويل كومبيان (سام) .. يزعل لمن أحد يقوله د. سام، "نادوني سام بس" .. بيقولكم جذي بأول محاضرة.. المهم انه حضوركم وانتباهكم معاه مهم لأن بتتسهل عليكم دراسة النوت (النوت وايد .. يوصلون 10 يمكن) .. وأنتوا وياه بالمحاضرة بيصير فيكم "الله سهل شحلات النوت والتوبكس" بس لاااااا إنه الفخ:weary: .. لازم تدرسون لأن وقت الدراسة بتنصدمون من الكمية، بيصير وضعكم هذا متى خذيناه!! ومتى انشرح أصلًا:tearsofjoy::tearsofjoy::tearsofjoy:


    بعدين بيرجع د. أحمد الهاشم يدرسكم أدوية الجهاز التنفسي .. مثل ما قلت سابقًا فـــــهههههههههــــــــــــممممممم.


    بعدين بتدرسون عن أدوية التخدير العام والموضعي وأدوية الendocrine .. بتدرسكم إياها د. ألطاف الرميان .. حضروا ونوتوا عدل لأنها تسأل بكل شي ينذكر بالمحاضرة .. حتى لو شي قالتلكم أنتوا بحثوا عنه .. هالجزء أيضا بتاخذونه على محاضرات وايد فيبيله مجهود.


    بعدين بتدرسون أدوية الجلدية والعظام .. راح تدرسكم د. جاسنثي ليمي .. هالدكتورة لازم لازم تحضرون محاضراتها لأن نوتها حيل زحمة فلمن تحضرون وتسمعون الشرح وتنوتون معاها بتصير نوتها أسهل .. واهي ماتقصر بالأمثلة والربط، بتحاول تسوي قصص معاكم بالكلاس.


    آخر شي راح تدرسون عن تعارضات الأدويه مع الأدوية ومع الأكل ومع الأعشاب وراح تعرفون منو CYP450 وشنو شغلته بالجسم بالضبط .. بتدرسكم د. ألطاف الرميان.



    Pathophysiology علم وظائف الأعضاء في الأمراض

    أنتوا درستو بسنة ثانية عن وظائف الأعضاء الطبيعية physiology .. ف الحين بتدرسون عن وظائف الأعضاء وقت المرض .. شنو يسبب المرض؟ شلون يدش؟ شنو اللي يخترب بالضبط؟ .. هالمادة جوها نفس الفسيو بالضبط من ناحية الدراسة .. هم يبيلها دراسة أول بأول لأنها نفس الفارما مستحيل تندرس بليلة الامتحان بس أسهل منه (بالنسبة لي على الأقل) .. القريد فيها مضمون نوعًا ما.


    تقسيمة الدرجات بالباثو بالكورس الأول كالتالي:

    كويزين على كل واحد منهم 5% .. التوتال 10%

    مدتيرم عليه 30%

    فاينل عليه 60%


    بالكورس الثاني قرروا يجربون يحطولنا ميني اسسمنتس نفس الفارما .. مادري إذا بيستمر هالشي أو لا .. ومادري إذا بيحطونه بالكورس الأول بعد ولا لا .. بس عمومًا هذي تقسيمة درجات الكورس الثاني:

    كويزين على كل واحد منهم 5% .. التوتال 10%

    10 ميني اسسمنتس (عبارة عن سؤالين عقب ماتخلصون كل نوتة تقريبا أو تتوزع النسبة حق كل دكتور) كل واحد عليه 1% .. التوتال 10%

    مدتيرم عليه 30%

    فاينل عليه 50%

    امتحانات هالمادة MCQs بس (اختياري).


    (الكورس الأول)

    راح تبدون بالجروح وتحوّل هالجروح إلى التهابات وشلون الجسم يعالج نفسه .. وراح تدرسون أمراض الدم بعد، مابتتعمقون فيها حيل بس بتاخذون الأشياء الرئيسية .. هالبارت راح تدرسكم إياه د. عبير عبدالله، دكتورة شرحها عسل عسل عسل .. وأسئلتها مكس مابين الفهم والحفظ.


    بعدين راح تدرسون أمراض القلب مع د. بيير مورو .. نفس مستوى الشرح بالفارما مو أصعب ولا أسهل ونفس مستوى الأسئلة بعد.


    عقبه بتدرسون الأمراض الجينية .. كروموسوم زايد، ناقص، خربان وهكذا .. راح يدرسكم د. داونسي المفروض إنه مر عليكم بسنة أولى (درسكم buffers بالكمستري) .. هذي كانت أحلى نوتة وأسهل نوتة وحدي حدي حدي تحسفت لأن مانتبهت بمحاضرته وقطيت نوتته (كانت هبتي fun run بالمحاضرات:tearsofjoy::tearsofjoy: .. لاتسوون مثلي) لأن أسئلته مبااااااشرة .. 1+1=2 بالضبط جذي.


    بعدين بتدرسون أنواع البكتيريا والأمراض اللي تسببها وشلون طريقة تعقيم الأشياء الملوثة بالبكتيريا .. بتدرسكم د. هنادي عمودي (هم درستكم بايو بسنة أولى) .. أسئلتها سهلة ومباشرة وشرحها أعجب من العجيب.


    عقبها بتدرسون عن الفيروسات والبروتوزوا والفطريات .. كل واحد وشنو الأمراض اللي يسببها .. بيدرسكم هالأشياء د. بوسالم مصطفى (درسكم بسنة أولى بعد) .. شرحه وأسئلته ونوته كـــــلها بسيطة ومباشرة.


    آخر شي بتدرسون الجهاز المناعي من الألف إلى الياء مع د. ميثم خاجة .. هني راح تشوفون الاشتطاط صج .. يبدع بالشرح .. يخليكم تنتبهون غصب من كثر مايندمج بالشرح .. هالبارت حسيته ممتع أكثر من الفارما .. لااااااازم تحضرون كل المحاضرات لأن كل محاضرة تعتمد على اللي قبلها .. نوتوا مع الدكتور وركزوا عدل عدل لأن هالبارت يبيله مخ مفتح ومركز عشان يثبت.



    (الكورس الثاني)

    راح تبلشون تدرسون عن الألم .. شنو يسبب الألم وشنو أنواع الأعصاب اللي تنقل إشارات الألم لي الجهاز العصبي ومن الجهاز العصبي لي مكان الألم .. شنو الناقلات العصبية(neurotransmitters) اللي تساعد بهالموضوع .. بيدرسكم د. ويلياس ماسوجا .. نفس طريقته بالفارما ماراح يتغير شي.


    بعدين راح تدرسون عن أمراض الجهاز الهضمي والبولي مع د. شارما .. هالدكتور أسئلتة مباشرة وماتطلع برا النوت كلش.


    تالي راح تدرسون أمراض الجهاز العصبي بالتفصيل مع سام ..حضوركم وفهمكم مهمين حيل لأنكم بتطولون بهالبارت (كثر الفارما تقريبًا) .. أسئلته وشرحه نفس مستوى الفارما.


    بعدين راح تدرسون أمراض الجهاز التنفسي مع د. أحمد الهاشم .. أرد وأكرر عليكم بالحضور والتنويت والفهم ياخوان.


    عقب راح تدرسون أمراض الendocrine .. زيادة الهرمونات أو نقصها شتسبب من أمراض .. بتدرسون هالجزء مع د. ألطاف الرميان .. هالجزء بعد بياخذ وايد محاضرات فلازم تركزون عليه وتعطونه حقه.


    أمراض العظام والجلد راح تدرسونها مع د. جاسنثي ليمي .. حضروا عشان تعرفون شلون تدرسون نوتها لأن فيها وايد حجي وكل شي فوق بعض .. أسئلتها مباشرة وحلوة.


    آخر شي بتدرسون الأورام بأنواعها مع د. عبير عبدالله .. هالبارت حيل ممتع وممكن ينضمن .. عليه كمية محاضرات وايد وحرام تتنحون بأسئلته.


    وخلصنا الباثو بحمدالله .. بتكون هالسنة اهي الوحيدة اللي بتشوفون فيها هالمادة، بيضوها بارك الله فيكم:heart:.



    Pharmaceutical chemistry كيمياء صيدلانية

    عندي لكم خبر حلو ياخوان .. أول كورس بيكون آخر كورس تاخذون فيه لاب كمستري:dancer::dancer::dancer: .. والحلو إنه ختامها مسك مع هاللاب لأنه حيل حلو وسعيد جدًا جدًا جدًا .. الكيميا هالكورس أبعد مايكون عن الكيميا اللي بسنة ثانية .. اللي جوهم نادي راح يحبون متيريال الكورس الأول حيل .. أما الكورس الثاني مادري شلون أوصف لكم إياه لأن العموم كان مهيّت المادة شوي:tonguewink: .. المتيريال سهل بس كميته وايد، ودراسته يبيلها هندسة عشان تلقون لها وقت يكفي عشان تدرسون كل الكمية .. سوري إذا قاع أخرعكم بس صدقوني لمن تبدون تداومون راح تعرفون تحلون موضوع الوقت بروحكم بدون نصايح أحد.


    المهم ماعلينا .. أحس وايد شطحت:oldwoman:


    تقسيمة درجات الكيميا بالكورس الأول كالتالي:

    5% كويزات اللاب

    10% على ريبورتات اللاب

    5% على فاينل اللاب

    30% على مدتيرم

    50% على فاينل

    تقسيمة درجات الكيميا بالكورس الثاني كالتالي:

    كويزين كل واحد عليه 5% .. التوتال 10%

    مدتيرم عليه 30%

    فاينل عليه 60%

    أسئلة هالمادة MCQs.


    (الكورس الأول)

    قتلكم إنه الناس اللي جوهم نادي وهلثي فود راح يستانسون على هالكورس .. بتدرسون عن الكربوهيدرات والأمينوأسدز والبروتينات والدهون .. وكل واحد وطريقة هضمه وتحويله إلى طاقة بالتفصيل (metabolism) عقبها بتدرسون كل شي يخص الفيتامينات والمعادن .. زيادتها وقلتها شتسوي بالجسم .. راح تدرسكم د. ندى الحساوي، حضروا ونوتوا معاها واللي ماتستوعبونه سئلوها .. ماعندها مانع تعيد ألف مرة المهم الكل يكون فاهم وعارف شسالفة .. أسئلتها سهلة ومباشرة


    بتدرسون بعد عن الإنزيمات والحمض النووي والchemical messengers .. بتدرسون هالسوالف مع د. يونس لقماني .. الدكتور شرحه حلو وأسئلته لطيفة على القلب.


    والحين بقولكم عن آخر لاب كمستري بحياتكم (ياخي آنا مستانسة أكثر منكم:dancer::tearsofjoy:) .. اللاب بيكون كالعادة تطبيق عملي على اللي خذيتوه بالمحاضرات .. ببداية كل لاب راح يكون في كويز من 5 أسئلة عن اللي بتاخذونه بهاللاب .. بمعنى إنكم راح تدرسون التجربة اللي بتاخذونها باللاب بالبيت وتيون تمتحنون فيها، بعدييييــن يبلش الشرح والشغل .. باللاب راح يخلون كل 2 يشتغلون مع بعض وحسب شغلهم ياخذون الدرجة بالريبورت ..بامتحان الفاينل مال اللاب راح تشتغلون بروحكم .. يعني لازم باللابات تكونون تعرفون شسالفة، وقت الخلط منو ينحط أول؟ يحتاج يتصخن ولا لازم ينحط بثلج؟ .. ألوان الend points مهمة ولازم تعرفونها .. وإذا في مسائل لازم تعرفون شلون تحلونها؟.


    (الكورس الثاني)

    هالكورس المادة هينة ولينة.. بتكونون ماخذين أغلب الأشياء بالمواد الثانية فبتكون الدراسة أسهل عليكم .. وماكو لاب:headmassage:.


    راح تبدون بمقدمة عن شلون نعدل على شكل الدوا الكيميائي بحيث نخلي طريقة أخذه أحسن (أقل عوارمثلا) .. وبتاخذون بعد عن المسكنات وأدوية القلب والتخدير والحساسية ومدرات البول والفيتامينات، بتدرسون عن ستركـﭽراتهم مميزاتهم حق شنو نستخدمهم أعراضهم الجانبية (الوضع فارما متنكر بكمستري بس على أسهل:bowing:) .. بتاخذون كل هذا مع د. لاديزلاف نيفوتني، راح يحدد معاكم الchemical structures اللي يبيكم تحفظونهم .. أنتو حفظوهم كلهم لأنه بالامتحان اييب اللي حددهم لكم وزيادة عليهم اللي قال ماله داعي تحفظونهم .. غير جذي الشرح بيكون حلو لو بس تصيدون الأكسنت مالته .. يمكن فكرتكم عنه سيئة من ثانية بس بثالثة حيل غير .. بتتعودون عليه من كثر المحاضرات.


    بتاخذون بعد عن الخواص الفيزيائية والكيميائية حق الدوا وشلون ممكن نلعب فيها عشان نحسّن تأثير الدوا بالجسم أو نطوّل وقت تخزينه أو نقلل أعراضه الجانبية .. هالبارت راح تشرحه لكم د. ندى الحساوي ..بيكون الوضع نفس الكورس الأول، حضوركم هالبارت مهم لأنها بتشرح كل المحاضرات بنوتة وحدة طويييييييييييلة ف لازم تتعلمون الربط .. كانت ضيم بالنسبة لي لأني ماكنت أحضر أو أحضر مانتبه:nogood:.


    عقب بتدرسون عن طرق الmetabolism اللي تأثر على الأدوية (oxidation – reduction – hydrolysis – sulfation – glucoronidation - etc..) بيكون مشابه حق اللي شرحه لكم د. فيليبس بسنة ثانية .. وهم بتدرسون عن الCNS depressants & stimulants )منشطات ومثبطات الجهاز العصبي( .. آخر شي بتدرسون عن الsteriods .. هالجزئية راح يشرحها لكم د. محمد عبدالحميد .. هالدكتور لااااااازم حضور وتنويت .. شرحه قوي ويعيد ويزيد بالشرح .. وإذا ماقدرتوا تحضرون أخذوا تنويت بعض، لأن هالدكتور نوته فاضية تقريبًا فلازم تكتبون كل اللي يقوله .. بالضبط بالضبط يحطلكم اسم الدوا والstructure ماله بدون كلام، وبالمحاضرة يمسكه ويشرح عليه بالتفصيل الممل .. نظام أسئلته بالامتحان نفس د. فيليبس يعني عادي يسأل عن النوتة كلها بسؤال واحد .. بس أسئلته سهلة بشكل عام .. ولمن يخلص شرح المتيريال ماله بيحط لكم جم سؤال وتتناقشون فيهم بالكلاس.



    Pharmaceutics صيدلانيات

    بسنة ثانية خذيتوا أشكال الأدوية بشكل عام (حبوب – كبسولات – لزقات – شراب – الخ ..) هالسنة راح تدرسونهم بالتفصيل .. شنو تضيفون من مواد حافظة من ألوان من مضادات ميكروبات anti-microbes من مضادات أكسدة anti-oxidants من buffers الخ الخ الخ .. هالسنة بتكون مادة السوتكس مادة جبر خاطر .. على مدى السنين اللي طافت كانت الدرجات فيها عالية .. ينياب فيها As و Bs بس عطوها حقها بالدراسة .. هم بتكون من المواد اللي كلاساتها مريحة وممتعة، عن نفسي كنت أشوفها مهونة علي سنة ثالثة بكبرها .. المتيريال حلو والدكاترة عجيبين والامتحانات تينن .. من ناحية اللابات بتكون عجيبة .. راح تسوون أدوية بسيطة (شراب وكريمات ولوشنات وكذا).


    تقسيمة درجات السوتكس بالكورسين كالتالي:

    4 كويزات|واجبات كل واحد عليه 2.5% .. التوتال 10%

    ريبورتات وفاينل لاب عليهم 10%

    30% على المدتيرم

    50% على الفاينل

    أسئلة هالمادة MCQs و SNQs.


    (الكورس الأول)

    راح تدرسون بالبداية عن الadditives بأنواعهم .. متى نضيفهم وليش وشكثر نحط منهم وشلون نختبر ثبات الدوا وشكثر راح يتأثر الدوا بهالإضافات .. بيدرسكم د. يعقوب البصارة أكيد مر عليكم بسنة ثانية بس مادرسكم وايد (بيدرسكم 80% من السوتكس بسنة ثالثة) .. شرحه قوي وكلاسه خفيف على القلب ويحب يتغشمر ويسولف مع الطلبة بس عاد مو تطيحون الميانة .. مايحب التأخير على المحاضرة أو اللاب، مايحب التلفون، مايحب السوالف الجانبية حتى لو كنتوا تسئلون بعض عن شي يخص الشرح، مايحب تنسون أغراضكم (ماركرز – آلات حاسبة – أقلام) .. كل هالأشياء يعتبرها قلة اهتمام بالمادة وراح يطرد أو ينقص درجات عشانها .. أسئلته بشكل عام سهلة وماتطلع برا النوتة بس يبيلها حفظ.


    بعدين راح تبلشون تدرسون أشكال الأدوية وراح تبدون بالأدوية السائلة .. سواء اللي تنشرب أو القطرات أو اللي تنحط على الجسم .. بتمرون على الإضافات اللي ممكن تنضاف على هالأدوية .. بتدرسكم د. منيرة السراج وهالدكتورة حيل حيل حيل أحب شرحها .. تحسسكم إنه الحياة وردية والدراسة وسهلة ويلا ندرس نوتها، ونوتها بسيطة وواضحة .. حتى هالدكتورة أسئلتها سهلة ومباشرة وماتطلع برا النوتة بس يبيلها حفظ.


    (الكورس الثاني)

    هالكورس بتكملون على الأدوية السائلة وبتدرسون الemulsion والإبر بأنواعها (بالوريد – بالعضل – تحت الجلد – بالمفصل – الخ) والبخاخات aerosols .. بتدرسون هالأشياء مع د. يعقوب .. نفس السستم مال الكورس الأول ماتغير.


    وبعد بتدرسون أنواع الدهانات (كريم – جل – معجون – الخ) وشلون الجلد يمص هالأدوية ويوصلها الدم وشنو الإضافات اللي تساعد بهالشي .. وبتدرسون بعد عن اللزقات (لزقات النيكوتين مثلا) شكثر كمية الدوا اللي ممكن ينحط بهاللزقة وشلون تترتب طبقات اللزقة وهكذا .. هالأشياء بتدرسونها مع د. عبدالعظيم زغلول، شرحه هااادي وواضح بس قعدوا جدام عشان تنتبهون، لمن تقعدون ورا يصير شي سحري يخليكم ماتنتبهون عادي تتنحون بليتات القاعة:tearsofjoy: .. ركزوا معاه لأن أمثلته سهلة وتتذكرونها بالامتحان .. ومثل باجي دكاترة السوتكس، أسئلته ماتطلع برا النوت وتكون مباشرة.

    اللاب بالكورسين مايختلفون عن لابات سنة ثانية .. نفس الTAs بيدرسونكم، وإذا كنتوا كارهين اللاب وودكم تشوفون شي يشجعكم عليه شوفوا هالثريد.

    https://twitter.com/i/moments/1014142141629640707


    Practice theory مزاولة مهنة الصيدلة

    هذي المادة راح تكمّل على اللي درستوه بسنة ثانية، راح تدرسون عن أكثر الأمراض المنتشرة (اللي تخلي الناس يمرون على الصيدلية بدال المستشفى) وأسبابها والعلاجات اللي تنعطى بدون وصفة مع طريقة الاستخدام بالضبط .. التحلطم اللي تسمعونه عن هالمادة يكون بسبة إنه العموم مايلحق يدرس كل النوت.


    تقسيمة درجات البراكتس بالكورس الأول كالتالي:

    كويزين كل واحد عليه 7.5% .. التوتال 15%

    مدتيرم عليه 30%

    فاينل عليه 55%

    أما الكورس الثاني بتكون الدرجات كالتالي:

    كويزين وأسسمنت بنهاية كل محاضرة .. التوتال 15%

    مدتيرم عليه 30%

    فاينل عليه 55%

    الدرجات اللي تتوزع على الكويزات والأسسمنتات تتقسم حسب كوردينيتر المادة.

    أسئلة هالمادة MCQs و SNQs.


    (الكورس الأول)

    بتدرسون عن أمراض العين والأذن والفم والصداع والحرارة والعضلات والجلد وحب الشباب وحروق الشمس وتساقط الشعر .. هالأشياء بتدرسها لكم د. منى مراد كلش كلش ماتطلع برا النوتة لا خلال الشرح ولا الأسئلة.


    عقب بتدرسون عن التهابات حفاضات اليهال والجروح والحروق والفطريات وأمراض الجهاز الهضمي .. بتدرسكم د. فاطمة جراغ، نفس طريقة د. منى مراد بالشرح والأسئلة.


    آخر شي بتدرسون عن الإنفلونزا والكحة والنشلة واللوعة .. بيدرسكم د. سامويل كوشي، ماذكر طريقة شرحه (كنا واصلين آخر الكورس وبصراحة كنت أبي أعطل فما كنت أنتبه:nailpolish:) بس أسئلته بالامتحان زينة.


    (الكورس الثاني)

    بهالكورس راح تبدون تتعمقون بالبراكتس أكثر .. وبتدرسون حالات معقدة أكثر من الكورس الأول .. ممكن تييكم حتى الحالات اللي يبيلها مراجعات مستشفى.


    راح تاخذون طريقة أخذ التاريخ المرضي حق المرضى وأهم الأسئلة اللي لازم تنسئل وتصنيف المشاكل الطبية .. هالأشياء بتدرسونها مع د. تانيا بيّوض هالدكتورة تحب تسوي أكتفتيز بالكلاس وتحب التفاعل وأسئلتها مباشرة.


    وراح تاخذون بعد عن طريقة البحث عن المعلومات وأنواع الدراسات، هالشي مشابه حق الepidemiology مال سنة أولى .. بيدرسكم د. صلاح وحيدي حسيت شرحه شوي معقد بس بالامتحان كانت أسئلته سهلة.


    بعدها بتاخذون طريقة قراءة التحاليل وشنو التحاليل اللي نسويها حق اللي فيهم سكر أو ضغط أو قلب .. بيدرسكم د. عبدالمنعم عوض هالدكتور شرحه شوي سريع بس حيل حيل حلو بس لازم تنوتون معاه وعقب التنويت تفريغ بعد .. أهو نظامه يزف على الخفيف بس عادي خلوا روحكم رياضية لأن هالشدة إهي اللي بتخلي شغلكم مضبوط لمن تتوظفون، وهدفه مو يمتحنكم كثر ما إنه يعلمكم تكونون دقيقين .. أسئلته بالامتحان كانت سهلة بس يبيلها أحد دارس عدل عدل عدل.


    بعده بتدرسون عن أمراض الجهاز البولي والجهاز التناسلي الذكري .. بتعطيكم إياها د. فاطمة جراغ، مايتيغر نظامها عن الكورس الأول.


    بعدين بتدرسكم د. دلال الطويل عن حالات الجهاز الهضمي .. كلاسها ممتع وتحب النقاشات بس التنويت معاها مهم، أسئلتها بالمتحان زينه بس يبيلها تركيز لأن ساعات تييب معلومة مذكورة بنوتة وتكملتها بنوتة ثانية.


    بعدين بتدرسون عن دورة حياة الجهاز التناسلي الأنثوي من البلوغ إلى سن اليأس شنو الحالات المرضية اللي ممكن تشوفونها وشلون تتصرفون معاها .. بتدرسكم د. فاطمة الصالح، الشرح عجيب والأسئلة أعجب .. لازم تنويت وانتباه بالمحاضرة والأشياء اللي تقول عنها اقروها بروحكم لاتسحبون عليها لأنها تيي بالامتحان.


    آخر شي بتدرسون عن موانع الحمل بأنواعها وطريقة استخدامها وتفيد مع منو وتفشل مع منو الخ الخ .. بتدرسون هالسوالف مع د. مريم العويّش، مرت عليكم بسنة ثانية أتوقع .. شرحها حلو وماتحب تطلع من المحاضرة إلا والكل فاهم .. أسئلتها حلوة بعد.



    Practice lab مزاولة مهنة الصيدلة – عملي

    تقسيمة درجات لاب البراكتس بالكورس الأول كالتالي:

    تقييم شغلكم باللاب 15%

    المدتيرم عليه 30%

    الفاينل عليه 55%

    تقسيمة الدرجات بالكورس الثاني:

    شغل اللاب 20%

    المدتيرم 30%

    الفاينل 50%


    (الكورس الأول)

    لاب الكورس الأول بيكون تطبيق على النوت اللي خذيتوها، اللي إهي الحالات اللي تيي الصيدلية وغالبا تكون ماتحتاج مستشفى .. الTAs راح يمثلون إنهم المرضى ويايين ياخذون منكم العلاج (counseling) .. التقييم بيكون على الأسئلة اللي تسئلونها والcommunication skills .. وراح يكون في بارت نفس اللي خذيتوه بلاب سنة ثانية، اللي أهو جزء ترجمة الوصفات الطبية والأخطاء اللي فيها وطريقة كتابتها مع أسئلة تستخدمون فيها الBNF.


    طريقة المدتيرم والفاينل باللاب بتكون إنه وقت الامتحان يتقسم بين جزء الوصفات والBNF وبين ال counseling .. الجزء الأول بيكون باللاب تقريبا 30 ستيشن توقفون عند كل ستيشن 5-6 دقايق .. الستيشن ممكن يكون تعديل وصفة، كتابة وصفة، BNF، أو راحة .. لمن تخلصون راح يقسمونكم قروبات حسب عددكم بالدفعة ويوزعونكم على غرف عشان تسوون الcounseling .. الTAs بيمثلون إنهم مرضى وأنتوا الصيادلة وبيكون معاكم TA أو دكتور عشان يقيّمكم .. بيحطولكم تايمر 8 دقايق عشان تخلصون كل شي.

    (الكورس الثاني)

    أول شي راح تاخذون لاب عن تصنيف المشاكل الطبية اللي تكتشفونها .. هل لها علاقة بتأثير الدوا (في دوا أحسم منه حق هالحالة مثلا) ولا بأعراضه الجانبية ولا بالمريض نفسه (ينسى أو مايبي ياخذ الدوا لأنه يشوف ما منه فايدة) ولا حتى بسبب أخذه للدوا (يكون المريض ماخذه من كيفه واهو مايحتاجه أو مو ماخذ دوا كلش ومايدري عن مرضه) .. عقب بتاخذون تطبيق عمل على طريقة البحث عن المعلومات الطبية.

    بعدين بتتعلمون تسوون شي اسمه care plan وهالشي بيستمر معاكم لين تتخرجون ف لازم تعرفون شلون تسوونه عدل .. تبدون أول شي بمعلومات المريض (وزنه، طوله، عمره، تاريخ العائلة المرضي، عنده حساسيات من شي، الخ الخ) بعدين تبدون تطلعون المشاكل اللي يعاني منها المريض وتعالجونها مع شرح كل شي بالتفصيل وآخر شي بيكون الfollow up عشان تشوفون إذا العلاج مفيد مع المريض .. طبعًا ماراح تنطرون المريض يروح ويرد ف بتحطون كل الاحتمالات الممكنة، بالعربي راح تكتبون كل شي يطري على بالكم سواء كان مهم أو لا .. كل هذا بتسوونه باللاب كقروب وهالقروب بيشتغلون ويا بعض من أول الكورس لي آخره .. يعني بيتقسم الشغل بينكم جذي : أحد بيطلع كل المشاكل الموجودة بالمريض، وأحد يعالج هالمشاكل، وأحد يطلع معلومات المريض وهكذا.

    المدتيرم والفاينل بهالكورس بيكونون كتابة، الفرق عن شغل اللاب إنكم بتسوون كل شي بروحكم مو كقروب، يعني راح تقرون عن حالة المريض وتحاولون تطلعون اللي يطلبونه منكم .. يعني مثلًا يعطونكم 3 مرضى كل واحد يشكي من شي ويسئلونكم عن أشياء معينة، المريض الأول يقولولكم شنو العلاجات الغير طبية اللي بتساعد بحالته (non-pharmacological therapy) والمريض الثاني يطلبون منكم تطلعون كل المشاكل اللي عنده والثالث يطلبون منكم تسوون الfollow up.


    وبجذي خلصت سنة ثالثة .. أتمنى أكون كفّيت ووفّيت بالشرح وفدتكم وعسى الله ينصركم على هالسنة التعيسة وتتم روحكم المعنوية عالية لي آخر لحظة، موفقين!


    إذا احتجتوا أي شي تقدرون تتواصلون معاي بتويتر أي وقت تبونه:
    https://twitter.com/Fak27_
     
    Last edited: ‏3/7/18
    Ghadeer AlDahham and KU-Med like this.
  2. Ghadeer AlDahham

    Ghadeer AlDahham Trainee

    Joined:
    ‏13/6/18
    Messages:
    3
    خوش شرح :hearteyes:
    يعطيج العافيه
     

Share This Page