16' تجربتي في سنة ثانية في كلية الصيدلة

Discussion in 'سنة ثانية' started by Shahad, ‏28/8/18.

?

استفدت من المقالة ؟

  1. نعم

  2. لا

Results are only viewable after voting.

  1. Shahad

    Shahad Trainee

    Joined:
    ‏11/8/17
    Messages:
    2
    السلام عليكم و رحمة الله و بركاته، الف مبروك نجاحكم و انتهائكم من سنة اولى و الله يوفقكم بباجي مشواركم .

    سنة ثانية بالكورس الاول راح تبلشون تاخذون مواد صيدلة بس كلها تعتبر للحين مواد عامة. الكورس هذا وايد سهل و تقدرون ترفعون فيه معدلاتكم بس لازم تعرفون شلون تنظمون وقتكم بين الدراسة و تسليم مقالات لمادة الانجليزي. لعبة هالكورس اهوا انه راح يضغطونكم بين كويزات الكمستري و الفاينايت و تسليم الانقلش، اللي يقدر ينظم وقته و يدرس اول باول بالطريقة الصحيحة بإذن الله بيطلع بدرجات حلوة تفرحه.


    الحين بتكلم عن المواد بالتفصيل.
    الكورس هذا راح تاخذون اربع مواد (انحليزي١٨٣- اناتومي- اورقانك كمستري- فاينايت).
    اول مادة بتكلم عنها
    Organic Chemistry

    Credits: 4
    المادة تنقسم لثلاث اقسام (نظري- عملي- تتوريال)

    الجزء النظري:
    راح يدرسونكم دكتور فلبيس و دكتورة فاطمة.
    المادة وايد ممتعة راح تدرسون فيها اساسيات الكيمياء اللي راح تعتمدون عليها باجي السنين راح تاخذون فيها عن الايزومرز و انواعهم و بعدها راح تاخذون كل المجموعات الوظيفية مثل الالكان، الكين، الخ.. راح تعرفون تسميتهم، خواصهم الكميائية و الفيزيائية، تفاعلاتهم، و طرق تحضيرهم.
    اذكر سوو لنا دورات مع دكتور من برا الكلية و كان شرحه وايد ممتاز و يخليكم تحبون المادة و كملنا معاه لي نهاية الكورس. وايد مهم بعد ما تدرسون النوت تحلون اسئلة الكتاب علشان تتعودون علي نظام اسئلة الامتحان. و الكتاب وايد شرحه حلو فأي شي ما تفهمونة حاولوا ترجعون للكتاب. لما تدرسون النوت راح يكون في وايد تفاعلات لازم تكونون فاهمينها و حافظينها عدل لانه امتحان الميدتيرم راح يكون في شورت نوت راح يكتبلكم نص تفاعل و انتوا تكملون الباجي. بعطيكم مثال على تفاعل عام الحين كلنا نعرف انه
    ‫(‬كحول+ حمض كربوكسيلي ـــــــ> استر + ماء‫)‬
    السؤال بالامتحان يكون
    Alcohol +? --->? + H2O
    فلازم تكونون عارفين التفاعل من كل اتجاهات. أنا كنت احفظ التفاعل من اتجاه واحد فتوهقت بالامتحان أتمنى محد يكرر غلطتي.


    الجزء العملي:
    راح يكون في لاب كل اسبوع و راح يدرسونكم التجربة نظري بعدها تطبقون عملي وتسلمون لاب ريبورت عليه درجات. اللاب ريبورت راح يكون ورقة اول ما تخلص دكتورة اللاب شرح راح تطبقون و تكتبون نتائجكم و تسلمونهم لهم و اهما راح يقيمون شغلكم على أساس الريبورت. نصيحة حاولوا تدرسون نوت اللاب و تنتبهون مع الدكتورة عدل لانه راح يكون عليهم كويز نظري بنهاية الكورس.

    التتوريال:
    طبعا الحضور مو إلزامي بس راح يكون حل اسئلة على النوت و الدكتور فليبس وايد اييب اشياء بالامتحان من التتوريال و من كلامة فانتبهوا معاه عدل.

    الدرجات:
    المادة راح يكون فيها امتحان الميدتيرم عليه ٢٠٪؜ و الفاينل ٥٠٪؜
    راح يكون في كوزين واحد قبل الميد و واحد قبل الفاينل كل كويز عليه ٥٪؜


    درجات اللاب: كويز اللاب النظري + لاب ريبورت عليهم= 10٪
    و الامتحان العملي عليه 10٪


    اسئلة الامتحان ٩٩٪؜ منهم معتمد عالفهم و اغلبها تفاعلات يعني نادراً ما يحط تعريف او شي جذي. الدكتور وايد طيب اي شي ما تفهمونه سئلوه و راح يوضحه لكم ان شاء الله و اهم شي حلو امتحانات قديمة علشان تعرفون نظام الدكتور.


    Anatomy
    Credits: 3
    المادة هاذي تتكلم عن التشريح راح تاخذون فيها تشريح كل اجهزة الجسم راح تدرسون اشياء وايد سطحية عن التشريح.
    المادة تنقسم لحزء (عملي و نظري).

    المادة وايد سهلة و مجرد فهم و حفظ النوت باذن الله تضمون full mark.
    النظري:
    راح يدرسونكم وايد دكاترة:
    د. ماثيو: راح يدرسكم نوت عن الخلية و الانقسام و انواع الانسجة بشكل وايد مبسط و سطحي
    و اسألته بالامتحان زينة و انتبهوا معاه باللكجر لانه يعطي امثلة على اسئلتة بالامتحان.
    د. أكرم: راح يدرسكم عن تشريح العظام و العضلات و اغلب أسئلته معتمدة عالحفظ.
    هذا بالنسبة للميدتيرم راح يكونون عدد النوت وايد قليل مقارنه بالفاينل. بالفاينل راح تكون الكمية اكبر و ادسم مو صعبة بس يبليها مجابل و وايد ناس ياخذون بالميد A و بالفاينل ما يعطونه حقه فينزلون. كمية الفاينل تتكلم عن جهاز جهاز و الاسئلة يعني غالبا ما تطلع برا النوت.

    العملي:
    بالنسية للميد راح يكون جزئية الدكتور ماثيو راح تكون صور بقاعة المحاضره و الاشياء اللي يركز عليها اهيا اللي تيي بالامتحان. دكتور اكرم راح تروحون المشرحه
    طريقة الامتحان يحطون لكم باوربوينت و راح يكون في تايمر لكل صورة دقيقة و تشوفون الصورة و تكتبون الجزء بالورقة
    الدكتور ماثيو يحط صور نفس اللي موجودة بالنوت مال العملي
    دكتور أكرم راح يحط صور من عنده بس واضحيين
    بالنسبة للفاينل اغلب الوقت راح تروحون مشرحه الأسئلة بالامتحان راح تكون نفس الميد صور
    بس الفرق انه الدكاتره راح يعطونكم اسماء الأعضاء اللي يبونكم تعرفونها و الصور بالامتحان ولا مرة شفتوها من قبل
    دكتور محرز الصور مالته وايد واضحة
    دكتور مقداد راح يقول لكم حاولوا تشوفون صور وايد لانه الصور اللي يحطها بالامتحان شوي تكون confusing بس اللي متدرب الصور عدل راح يكون الوضع عنده سهالات.

    الدرجات:
    ما اذكر بصراحة تقسيمة الدرجات.


    Finite 115

    Credits: 3
    المادة تعبر مراجعة على الرياضيات اللي اخذتوه من قبل و في شوي أشياء يديدة. راح تدرسون بالبداية عن المعادلات و فرقها عن المتباينات و راح تدشون بتفاصيل اكثر و مواضيع ثانية و نهاية الكورس راح تدرسون عن الاحتمالات
    الدكتورة وفاء شرحها وايد حلو و تعاملها مع الطلبة حتى حلو و الميزة فيها انها تخليكم تطبقون معاها بالكلاس على المسآئل بحيث تثبت بمخكم طريقة الحل.
    الامتحان مايطلع من الأشياء اللي تعطيكم ياها حاولوا ما تطوفون و لا كلاس مرات قبل الامتحان تسوي مراجعة تشرح أفكار يديدة و غالباً تكون موجودة بالامتحان.
    المادة راح يكون فيها كويزات و فيها ميدتيرمين و فاينل
    حاولوا تدرسون اول بأول و تراجعون عدل و اَي شي مو فاهمينه سألو الدكتورة و ان شاء الله ماراح تقصر معاكم. و لازم تتدربون لانه المادة تعتمد علي كثرة الممارسة و كثر ما تدربتوا و خذت ايدكم راح يصير الوقت كافي لكم بالامتحان.
    كان في طلبة يقوولون لنا انه الدكتوره بتييب أشياء مو شارحتهم لكن الكلام هذا غير صحيح اللي يدرس النوت و أسئلة الكتاب باْذن الله يكونون كافيين و اذا عندكم وقت طلوا علي امتحانات قديمة و راح تلاقون في وأيد أشياء منهم مو معاكم فعادي طوفوهم.



    English 183

    Credits: 5
    المادة هذي تعتبر تطبيق على الأشياء اللي خذيتوها ب ١٨١ و ١٨٢ بس بدال مايكون كل شي جاهز لكم إنتوا اللي راح تسوون كل شي. و لازم تعرفون انه كل دكتور له قوانين و بالنهاية اهوا اللي راح يصلح لكم ف التزموا بالي يقوله و مالكم شغل بالكلاسات الثانية.

    المادة تنقسم لقسمين تسليم (اسايمنت و امتحان)
    Assignments

    راح يبدون معاكم شوي شوي و راح تكونون مطالبين إنكم تسوون
    Cause & effect essay 10%
    You will be required to choose a topic and then submit an outline (1.5%), rough draft (7.5), and final draft (1%) about it.​

    في بعض الدكاتره يطلبون من كل طالب ان يتقيد بمواضيع من تخصصه مثلا صيدلة يكتب عن أدوية و في دكاترة عادي يرضون للطلبة يكتبون عن اَي موضوع في نطاق الصحة.
    الدكاتره راح يعلمونهم كل شي تحتاجونها ان شاء الله.
    غالبا ال rough draft تكون عليها اكبر درجة و أهيا عبارة عن المقالة بعدها راح تسلمون final draft اللي تعتبر درجاتها هدية لكم لانه كل اللي تسوونه إنكم تصلحون أخطائكم اللي بال rough draft

    Oral presentation 15%
    You will be required to submit outline and working bibliography and your presentation will be scheduled later.
    ال working Bibliography عبارة عن المراجع اللي استخدمتوها علشان تسوون الoutline و البريزنتيشن نفسه، بس راح يطلبون منكم تسوونه بطريقة معينة و في مواقع تساعدكم انكم تسونها بس لا تعتمدون عليهم استخدموهم للتأكيد فقط لانه حرام تنقصون فيها حدها مضمونه.

    Research Paper 25%
    You will be required to submit outline (3%), working bibliography (3%), rough draft (16%), final draft (3%).​
    عليها اكبر نسبة من الدرجات و راح تكون وايد كبيرة و طويلة ما ابي أطول عليكم بالتفاصيل لانه الدكاتره ماراح يقصرون معاكم٠
    حاولوا ما تكررون اغلاطكم، خلصوا شغلكم مبجر، راجعوا عليه اكثر من مره و لو ربعكم يقدرون يراجعون لكم بعد شي حلو و الطلبة الكبار هم راح يساعدونكم إن شاء الله.

    الامتحانات
    في ميدتيرم عليه ١٠٪‏ و فاينل ٤٠٪‏ عبارة عن (لسننق و ريدنق و و فوكاب و أسئلة صايرة جنها قواعد راح تلاقون عليها أمثلة بالكتاب).

    مثلا السؤال ممكن يكون عن تركيبة ال cause& effect essay مثلا يقولكم صح أو خطأ انه يصير نسوي جذي بال C & E و هذا الشي راح تكونون تعرفونه من الكلاسات أو من الكتاب.

    حاولوا تعطون كل شي وقته و لا تقصرون مع اللسننق و الريدنق و عطوهم حقهم حاولوا ما تطوفون و لا تدريب بالكلاس و حتى في بالموقع حاولوا تسوونهم.

    بالنسبة للفوكاب راح يكونون موجودين بنهاية الكتاب مع ترجمتهم
    اما القواعد هاذي تدرسون لها من الكتاب و من الأسئلة اللي موجودة بموقع قسم الانجليزي.


    بالنسبة للدورات راح تكون حيل اقل من سنة أولي و راح تلاحظونانها راح تختفي تقربيا بالكورس الثاني
    حاولوا تحضرون دورات للاشياء اللي إنتوا مو فاهمينها لا تضيعون وقت على أشياء إنتوا عارفينها الوقت هذا أفضل تستغلون لراحتكم أو تسوون فيه شي مهم.
    بالنسبة لي كنت احضر دورات عبدالعزيز الشمري للاناتومي و استفدت منه بالعملي لانه يخليكم تحفظون معاه و بالنفس الوقت يعرف نظام الدكاتره.
    الفاينايت مثل ما قلت أستاذه وفاء تكفي بس كنت احضر لجوهر الشمري علشان اعرف نظام الامتحان.

    وبس هاذي تجربتي مع سنة ثانية اتمني أني ما طولت عليكم و استفدتوا و اللي عنده اَي سؤال يكلمني بتوتير (@shahodms) و ان شاء الله ماراح اقصر معاه.. بالتوفيق.
     
    Last edited: ‏28/8/18

Share This Page