احلام .. طموحات.. اهداف مركز العلوم الطبية.. كيف بدأت ؟

Discussion in 'اسـتـراحــة الـمـركـز' started by purple heart, ‏23/11/13.

  1. purple heart

    purple heart

    Staff Member Consultant
    Joined:
    ‏27/7/13
    Messages:
    95
    بسم الله الرحمن الرحيم
    السلام عليكم ورحمة الله وبركاته

    لكل شخص منا حكاية .. والأكيد وراء اختيار مركز العلوم الطبية كرغبة أولى في التقديم لجامعة الكويت .. قصة !!

    قد يكون هذا الاختيار حلم الطفولة .. او طموح نما بداخلك بعد التعرف على باقي التخصصات في الجامعة .. او يكون هدف وضعته نصب عينيك.. حبا لهذه المهن .. الطب .. الأسنان .. او الصيدلة.. او حتى اقتداء بشخص قريب منك .. او رغبة والديك .. الخ .. والأسباب كثيرة !!

    هذا الموضوع لكم .. اتمنى كل واحد فيكم يشارك بقصته . او حتى حلمه .. سواء تم .. او باذن الله راح يتم .. او حتى قدر الله بعدم تحقيق هذه الرغبة


    متى بدت فيكم هالرغبة ؟

    وشنو السر باختيارها ؟

    هل لكم احد من اهلكم بهالمجال ؟

    موقف شفته يختص بهالمجال .. اثر فيك .. حببك بالتخصص ..او حتى كان السبب بدخولك

    رأيك بهالتخصص ؟

    الصعوبة اللي واجهتك بالاختيار ؟

    احد عارضك فيه ؟

    واي شي يطري على بالكم .. يختص بهالموضوع ...

    اتمنى الكل يشارك .. وانا واثقة ان بنستفيد من تجارب بعض .. او حتى في اشخاص ممكن يبنون هالرغبة بعد كتابتكم لقصصكم




    وانا باذن الله بكتب قصتي كاملة [​IMG]
    بانتظار مشاركاتكم وقصصكم بكل شوق



    ** ملاحظة : وضعت الأسئلة للتحفيز على الكتابة .. وليس ككتابة سؤال وجواب فقط ..اخذوا راحتكم بالتعبير [​IMG]
     
  2. purple heart

    purple heart

    Staff Member Consultant
    Joined:
    ‏27/7/13
    Messages:
    95
    عشان أشجعكم..راح أحط لكم قصتي أول وحدة :)


    حلم الطفولة اصبح واقع !!


    من يوم كنت صغيرة..ما اذكر في حياتي اني اخترت لنفسي اجابة على سؤال " شنو بتصيرين لما تكبرين ؟ " جوابي كان بكل قوة .. دكتورة !! وما اذكر شنو كانت بدايته بالضبط .. بس عندي من قبل حب لمساعدة الناس .. ورسم البسمة على شفاتهم ..واشوف الحمدلله ان عندي قدرة كبيرة على التحمل .. ومستعدة ابدي غيري على نفسي وعلى راحتي .. واحس المناسب لها دكتورة .. ما شفت نفسي بأي مكان ثاني ابدا


    حتى كانوا ينادوني اهلي يا دكتورة.. لان عارفين حلمي .. او تصير مواقف غريبة .. مثلا بمختبر العلوم كنا نشرح الوردة .. وانا شوي شوي احاول ما اخربها.. فتيني الأبلة" انتي يا الجراحة..عفية عليج.." تتنيييييح.. انا جراحة ؟ شعور عجييييييب .. مع انها مو عارفة حلمي

    وعمتي دكتورة معروفة الحمدلله .. وسمعتها وايد حلوة وعلاقتها مع الناس طيبة .. لما نروح لها المستوصف استانس اكثر واكثر..فهم حببتني بالمهنة اكثر


    بدا هالحلم يكبر .. وصار طموح.. والخطوة الأولى لتحقيق هالشي اهيه الحصول على معدلات عالية في مرحلة المتوسط والثانوية ..كان الهدف جدامي بكل وضوح.. ولله الحمد تيسرت اموري وكان ترتيبي ما عمره نزل من العشر الأوائل ..وبعد التوفيق من رب العالمين .. الحمدلله دعم اهلي ما وقف ابد ..


    اذكر كنت اسأل امي عن ترتيب الرغبات " يما .. شنو احط رغبة ثانية بعد الطب ؟ " ردت علي " طب !! " .. " يما حبيبتي فهميني .. الأولى طب اوكي .. الثانية شنو ؟ " .. ردت علي " ولا شي .. انتي نقيتي طب اول وحدة وخلاص " .. ثقتهم كانت كبيرة فيني .. تعبت وايد .. وفرحة القبول .. ابددددد ما فرحت كثرها ..

    وانقبلت ولله الحمد .. عقبها .. للأسف امي خافت علي .. وقالت شحادج طب .. جان دشيتي هندسة .. او لا تدشين طب .. يا اسنان او صيدلة .. او طلعي .. !!! وقتها حيل تصعبت علي الأمور .. امي كانت اول من تشجعني .. فجأة قلبت .. وكل ما بيدها تحاول تغير رأيي ..فكان صراع نفسي .. ما اقدر اعبر عن تعبي عشان ابين لهم اني متحملة .. وبنفس الوقت لازم اتنافس مع باجي الطلبة على المقاعد ..فكثر ما اقدر اشد حيلي .. اغلط وتنزل درجاتي .. ارفعهم !! اتعلم من الغلط .. مع العلم ما كان عندي احد اكبر مني بالكلية ينصحني .. وما احب اسأل طلبة القوائم وانا ما اعرفهم .. جدامي وقت ونوت .. افهم كثر ما اقدر ..اسوي اللي علي وادعي واتوكل على ربي .. وانقبلت !! والحمدلله بمعدل حيل حلو .. ابتعدت عن ربعي فترات وابتعدت عن اهلي .. سهرت وتعبت ..بس نلت الحمدلله

    وعقبها امي الحمدلله ردت وصارت من اكثر الناس واقفين معاي .. اقتنعت بحلمي وطموحي .. وشافت اني قده .. ومستقبله حلو ..وباذن الله اكون قده واتخرج دكتورة ناجحة

    هذا المكان اللي استخرت ربي فيه .. وارتحت من استخارتي وانقبلت ..فاهوه اللي فيه الخير لي باذن الله ..وبعدين فكرت فيها .. هذا سبيل اني اطلب رضا ربي علي فيه .. واتمنى يكون سبب دخولي للجنة ..
    هذا المكان اللي بخليني انجز واساعد اهلي وعيال ديرتي .. وارفع اسمها ان شاء الله



    عسى الله يقدرني على هالشي..وبانتظار قصصكم :)

     
  3. Dr.ParroT

    Dr.ParroT

    Staff Member Consultant
    Joined:
    ‏20/7/13
    Messages:
    142
    يعطيج العافيه على الموضوع المميز

    صراحة ما عندي حلم معين .. أنا من النوع الي كل دقيقة عندي طموح xD

    بداية الطفولة كنت متعلق بـ أي شي يخص الجيش أو الشرطة ..

    طبعا بعدين من كلام الناس والأهل أن الطب أحسن شي .. إلخ من هالسوالف .. دخل هالشي شوي بمزاجي ..

    بس مثل ما قلت كل شوي طالع لي بتخصص بمرحلة المتوسطة والثانوية حبيت الهندسة - أعني هندسة الكمبيوتر - أحب سوالف البرمجه والتصميم ومن هالخرابيط وكنت حيل أبدع فيهم .. وخصوصا بعد ربعي كان يبون هالمجال أيام المتوسطة ، لا بعد حتى قررنا نسوي شركة متخصصة بالبرمجيات وصنع ألعاب الفيديو
    ( طاع التفكير بس .. xD - بعد قلنا ليش ما فيه ألعاب عربيه لازم ننافس يعني .. ) بس بعد ما تخرجنا ومن كلام الناس عن هندسة الكويت وتغير مزاج الربع وعدولهم عن هندسة الكمبيوتر إلى هندسة الميكانيكة .. قلت بنفسي انحش مالي مزاج بسوالف الرياضيات ..

    وزملائي بالثانوية بعضهم كانوا يبون الطب
    ( عاد اهني انا بلشت احبط فيهم شلكم بعوار الطب ودراسة طويلة .. إلخ من اسطوانة الناس المنتشرة ) بس كان موقفهم ثابث ..

    المهم بعد ما يخلص دوام الثانوية على ما أرجع البيت كان برنامجي المفضل في الإذاعة واحة المستمعين وكانوا الي يقدمونه وما زالوا يقدمونه بوعبدالله وبوشملان وكانوا يستضيفون منو ؟ الدكتور موسى الجويسر .. هالدكتور دخل قلبي من كلامه .. مبين أنه بشوش وطيب .. وتعامله راااااقي جدا .. عجبني رده على استفسارات الناس المتصلين وشلون الناس يدعون له بالخير .. اهني شوي شوي الطب قاعد يدش بمزاجي أكثر .. مرات لما تراجع المستشفى تشوف بعض أو معظم الدكاتره منفسين وحتى يكرهونك بالعلاج ويحدونك على الخاص من تعاملهم .. قلت بنفسي ودي هالشي يتغير وأشوف كل دكتور بمستوى الدكتور موسى الجويسر .. يأخي ابتسامتك للناس يمكن أهي90% من علاج المريض!
    ( ليش لأ يمكن أصير مدير مستشفى P: وأعدل بالقررات .. المهم إذا حجت البقر على قرونها :D )

    عاد اهني قررت خلاص أدخل الطب وخصوصا أصدقائي الآخرين كانت لهم نفس الرغبة وكانوا بعد يبون طب الكويت ..
    المهم أبوي كان يبيني ادرس طب براا وحتى أخواني .. صراحة ما أحب الغربة ولاني من الناس الي يحبون يسافرون وايد يمكن ما سافرت غير مرة أو مرتين .. الحين تبوني أدرس 7 سنين برا ؟!


    طيب حلم الطفولة الجيش ؟ طبعا لو قايلهم بدش الجيش على طول على قولة واحد من الربع جان إعدام على طول على هالنسبة xDD .. قررت بعد إن شاء الله ما اخلص الطب وسنة الإمتياز .. أدش دورة ضباط اختصاص .. وأتعين بالمستشفى العسكري بس وبجذي ما نسينا حلم الطفولة ;) ..

    أنزين وهندسة الكمبيوتر ؟! قلت أخليها هواية لأني ما احب أدرس أشياء ما راح تفيدني
    ( تذكرت مأساة وخرابيط وحشو مادة الكمبيوتر بالصف العاشر .. ) أحب اتعلم الأشياء الي أنا أبيها وعلى راحتي وبدون امتحانات ولا بطيخ .. فالحين صارت هواية وتعليم حر ..

    وبس جذي حاولت أغطي كل شي من مرحلة طفولتي لـ تخرجي من الثانوية العامة :) ..


    وبس انتهى مسلسلي :)


    ومشكورة مره ثانية على الفكرة والطرح والله يقدرنا على حمل هالأمانة
     
  4. purple heart

    purple heart

    Staff Member Consultant
    Joined:
    ‏27/7/13
    Messages:
    95
    الله يعافيك حياك الله
    ما شاء الله قصتك عجيبة..وخطتك وايد حلوة

    الدكتور موسى ما شاء الله عليه عجييييب ان شاء الله تكون احسن منه بعد
    موفق لكل خير دكتور
     
  5. مجند طبي

    مجند طبي Registrar

    Joined:
    ‏16/7/14
    Messages:
    30
    لاني دقيق و لماح وبشوش ..

    في الابتدائي و المتوسط كنت ابي طب

    لكن لما وصلت الثانوي كسائر العائلة قررت أكون محقق في وزارة الداخلية

    يعني ادش كلية الحقوق

    بس تغيرت كل الخطط من الصف العاشر

    لما كرهت مادة الاجتماعيات والرياضيات

    وبدأ شغف مادة الاحياء …. هذا الغموض اللي كنت ادور وليس

    وليس غموض قضايا و هوشات وامور سطحية

    الطب حياة وليس تخصص

    فأقتحمت مجال الطب ….كأول واحد في العائلة كلها "من عماني و خوالي بعد"

    وبعدها فتحت المجال ودخل وراي بعض أقربائي }}}} خربتهم

    بدال لا اصير محقق قانون راح اصير محقق بس هالمرة بالجسم :p
     
  6. purple heart

    purple heart

    Staff Member Consultant
    Joined:
    ‏27/7/13
    Messages:
    95
    مجند طبي


    ما شاء الله..دارت الدنيا ورجعت لطموح الابتدائي والمتوسط
    وفعلا اتفق معاك الطب حياة

    عسى الله يوفقك ويحقق طموحك وتصير محقق ناجح بالجسم ​
    :RpS_thumbup:

    شكرا على المشاركة
     
  7. ضـيـ KU-MED ــف

    ضـيـ KU-MED ــف ku-med.com

    " شغف ماده الاحياه " : اقتباس

    هذا الحب العميق بهالماده خلاني افكر كثييير بمركز العلوم الطبيه وغامرت بسنه من حياتي عشان هالشغف
     
  8. Dreamer

    Dreamer Trainee

    Joined:
    ‏7/8/15
    Messages:
    1
    Thank You Purple Heart for bringing this up! I might be a bit late but for what it's worth here's my story

    I was the smartest of my siblings. My mom had never taught me (she would struggle with teaching
    my brothers and sisters) and says she had never helped me with any of my homework. I was the smart, independent daughter. People would come and ask every now and then " What would you like to be when you grow up?" and my answer would always be " A Doctor". My parents set that dream for me and they would always tell me that I was smart and that I should become a doctor. So, I grew up linking smartness with doctors and thinking that all smart people were doctors. That continued until I entered high school. During that phase, things got a little bit more serious. As I mentioned before, my parents had always wanted me to become a doctor especially because we didn't have any female doctors in our family. One day, they told me that I should not feel forced into entering medical school and that I should only choose to attend it if it was my first choice, that this is my life and that I can choose where it's heading. Thats when I though "Hmm... Do I really want to become a doctor?". I had the brains.. but did I have the passion? After doing more research about medicine, I started to love it even more. I mean who wouldn't dream of helping
    people and drawing a smile on their face :RpS_laugh: Its the best thing EVER

    That moment reassured me that I do want to become a Doctor. Also, I loved Biology class so much in high school that I took 2 extra years of IB Biology. I was always happy when I entered the Bio classroom. You might think this is funny but honestly, Grey's Anatomy played a role too. I am obsessed with that show! I know that it is nothing like medical school especially here in Kuwait. However, I do like the idea it gives. The humanity of Doctors and their daily lives, waking up every day to help save lives! I am passionate about becoming a Doctor and it is my #1 goal​
     
  9. ضـيـ KU-MED ــف

    ضـيـ KU-MED ــف ku-med.com

    طبعا طموح الطب بدا معاي من لما كنت صغيره وكان عمري 4 سنين توفى ابوي بحادث سياره اثناء تعرضه بنوبه صرع عقبها انا قررت اني اصير دكتوره واساعد كل اللي يعانون من هالشي وصار الطب كل حياتي من يومها واقرا عنه وايد واي شي له علاقه في الطب احبه وعقبها قررت اني ادخل كليه الطب وبنفس الوقت اتعلم عن الدين واجمع بين العلم الحديث والدين الشرعي واوصل رسالتي للناس كلها وان شاء الله ..الله يقدرني على تحقيق طموحي
     
  10. Radiology

    Radiology Trainee

    Joined:
    ‏19/8/15
    Messages:
    2
    يوم كان عمري ست سنين كنت دائماً اشوف عمليات في برنامج من اجل صحتك و بعدها تطور عندي الطموح فكنت اتابع عمليات في برامج صحية و احاول افهمها و يوم صار عمري 13 سنة عنت اقرأ حق اهلي تقارير الاشعة و التحاليل و كان كلامي يطلع صح بعد ما يقرا لهم الدكتور في العيادة و كان حلم حياتي اني اكون من الدكاترة المهمين لكن لا تجري الرياح بما تشتهي السفن ما قدرت انقبل بالكلية لان القبول كان تعجيزي و معدل المكافئ عالي فقررت اني أتخصص اشعة لكن شغل الاشعة وايد متعب و ما عندك لقب معين المرضي بعض المرات ينادونك بلقب الممرضين و العاملين بالمستشفى مع كل هذا و شغلي في الاشعة دائماً احاول اني اتعلَّم تشخيص الأمراض و العمليات و نوعية العلاج عشان ما اقل علم عن علم الدكاترة و شكرًا
     

Share This Page